पोलादपूर बस स्थानकासमोरील अतिक्रमण हटविले

पोलादपूर बसस्थानकासमोरील अतिक्रमण हटविले
रस्ता मोकळा झाल्याने वाहतूक कोंडीतून सुटका
पोलादपूर, ता. ८ (बातमीदार) ः पोलादपूर बसस्थानकासमोरील अतिक्रमण हटविल्याने नागरिकांना दिलासा मिळाला आहे. गतवर्षी महामार्ग विभागामार्फत टपरीधारकांना नोटीस बजावण्यात आली होती. त्यानुसार बुधवार ७ मे रोजी येथील अतिक्रमण हटविण्यात आल्याने रस्‍त्‍याने मोकळा श्वास घेतला आहे.
पोलादपूर बसस्थानकासमोरील टपरीधारक गेल्या २५ ते ३० वर्षांपासून खाद्यपदार्थ विक्रीचा व्यवसाय करीत आहेत, मात्र २०१७ रोजी सुरू झालेल्या मुंबई-गोवा राष्ट्रीय महामार्गाच्या कामामुळे या टपऱ्या तोडण्यात आल्या. त्‍यानंतर पोलादपूर येथे महामार्गावर अंडरपास तयार करण्यात आला. या अंडरपासमुळे पोलादपूर बसस्थानकासमोरून जाणाऱ्या वाहनांची वर्दळ कमी झाली. अंडरपास व सर्व्हिस रोडमुळे टपरीधारकांचा व्यवसाय कमी झाला, शिवाय जागाही गेल्याने टपरीधारकांनी पोलादपूर बसस्थानकासमोरील राष्ट्रीय महामार्गाच्या अख्यत्‍यारीत येणाऱ्या पुलावर आपला व्‍यवसाय थाटला. एसटीच्या ग्राहकांवर टपरीचालक आपला व्‍यवसाय करू लागले, मात्र या टपऱ्यांमुळे रस्‍त्‍यावर वाहतूक कोंडी होऊ लागली. त्‍यामुळे महामार्ग प्रशासनाकडून गतवर्षी नोव्‍हेंबरमध्ये या टपऱ्या हटविण्याची नोटीस टपरीधारकांना देण्यात आली होती, मात्र तरीदेखील टपरीधारकांनी याबाबत कोणतीही कार्यवाही केली नाही. त्‍यामुळे अखेर ७ मे रोजी महामार्ग प्रशासनाने कारवाई करत येथील टपऱ्या हटविल्या. या कारवाईमुळे सदरील रस्‍त्याने मोकळा श्वास घेतला आहे.