हरित पनवेलसाठी सर्वतोपरी प्रयत्न करणार

पनवेल, ता. ७ (बातमीदार) : पर्यावरणाचे संतुलन राखण्यासाठी यावर्षी पनवेल महापालिकेमार्फत मोठ्या प्रमाणावर वृक्षलागवडीची मोहीम आयुक्त मंगेश चितळे यांच्या मार्गदर्शनाखाली हाती घेण्यात आलेली आहे. वृक्षलागवडीसोबत महापालिका हद्दीतील सार्वजनिक ठिकाणीही विविध वृक्षांची लागवड करून ‘हरित पनवेल’ करावे, असे निर्देश अतिरिक्त आयुक्त गणेश शेटे यांनी मंगळवारी (ता. ६) मुख्यालयात झालेल्या बैठकीत दिले.
पनवेल महापालिका क्षेत्रात होऊ घातलेल्या विकासामुळे मोठ्या प्रमाणावर वृक्षतोड झाली आहे. पालिकेमधील समाविष्ट गावे वगळता वसाहतीमधून वृक्षांची घनता खूप कमी आहे. त्यामुळे धुलिकणांसह पालिका क्षेत्रामध्ये प्रदूषण व उष्णतेचे प्रमाण वाढत आहे. मागील वर्षी पालिका क्षेत्रामध्ये विक्रमी तापमानाची नोंद झाली होती, त्या अनुषंगाने पालिका क्षेत्रात हरित पट्टा निर्माण करण्याची गरज निर्माण झाली आहे. स्थानिक परिस्थितीचा अंदाज घेऊन त्या ठिकाणी सहज लावता येतील, अशा वृक्षांची निवड करून तो भाग, प्रभाग हरित करावा, या कामासाठी स्थानिक सोसायटींची मदत घ्यावी. प्रसंगी संबंधित झाडे जगविण्यासाठी त्या सोसायटीला विनंती करावी, असेही शेटे यांनी या वेळी सांगितले.
-----------------
प्रायोगिक तत्त्वावर जागेची निवड करा!
प्रायोगिक तत्त्वावर पनवेल पालिका हद्दीतील एखादी स्मशानभूमी, एखादे उद्यान निवडून त्या ठिकाणी वृक्षांची लागवड करावी. तेथील अडचणींचा विचार करून पुढे वृक्षलागवड मोहीम अधिक जोपासावी, वाढवावी. यासाठी समाजातील सर्व घटकांची मदत घेणार असल्याचेही त्यांनी या बैठकीत सांगितले. या बैठकीसाठी उपायुक्त स्वरूप खारगे, सहाय्यक आयुक्त श्रीराम पवार, सर्व प्रभाग अधिकारी, उद्यान व्यवस्थापक उपस्थित होते.
-------------------
आयुक्त मंगेश चितळे यांच्या मार्गदर्शनाखाली पालिका क्षेत्रामध्ये मोठ्या प्रमाणावर हरित पट्टा निर्माण करण्यात येणार आहे. त्या अनुषंगाने वृक्षारोपण कार्यक्रम राबवला जाणार आहे. त्यासाठी पालिका क्षेत्रातील गृहनिर्माण सोसायट्या, सामाजिक संस्था, शैक्षणिक संकुले यांच्यासह समाजातील प्रत्येक घटकाचा सहभाग घेतला जाणार आहे. तसेच पालिका क्षेत्रात वृक्षतोड करणाऱ्यांवर कडक कारवाई करण्यात येणार आहे.
- गणेश शेटे, अतिरिक्त आयुक्त, पनवेल महापालिका