भरपाईच्या कार्यवाहीला पालकमंत्र्यांचे निर्देश

पालघर, ता. ८ (बातमीदार) : अवकाळी पावसामुळे पालघर जिल्ह्यात झालेल्या नुकसानीचा आढावा घेण्याचे, तसेच सार्वजनिक सुरक्षेची खात्री करण्याचे आणि जेथे आवश्यक असेल तेथे त्वरित मदत पुरवण्याचे निर्देश पालकमंत्री गणेश नाईक यांनी जिल्हा प्रशासनाला दिले आहेत.

पालघर जिल्ह्यात अवकाळी पावसासह आलेल्या वादळी वाऱ्यामुळे ७६७ हून अधिक घरांचे नुकसान झाले आहे. तसेच सुमारे ५० मासेमारी नौकादेखील नुकसानग्रस्त झाल्या आहेत. वादळ आणि पावसामुळे पालघरच्या अनेक तालुक्यांना मोठ्या प्रमाणावर फटका बसला. डहाणू तालुक्यात सर्वाधिक २३० घरांचे नुकसान झाले. विक्रमगड आणि वाडा येथे प्रत्येकी ९२, जव्हारमध्ये ८९, मोखाडा येथे ८७, पालघरमध्ये ८५, तलासरीत ६३ आणि वसईमध्ये २९ घरांचे नुकसान झाले आहे. धाकटी डहाणू गावात सुमारे ५० मासेमारी नौका आणि १० ते १२ घरे नुकसानग्रस्त झाली आहेत. या घटनेची माहिती मिळाल्यानंतर पालकमंत्री गणेश नाईक यांनी परिस्थितीची माहिती घेऊन तातडीने मदतकार्य सुरू करण्याचे आदेश दिले. परिस्थितीचा आढावा घेण्यासाठी आणि मदत पोहोचवण्यासाठी वरिष्ठ अधिकाऱ्यांची टीम प्रभावित भागात पाठविण्यात आली आहे.