बेकायदा बांधकामे रडारवर

भिवंडी, ता.८ (बातमीदार): भिवंडी निजामपूर शहर महापालिका क्षेत्रातील सर्वच मालमत्तांचे नव्याने सर्वेक्षण करण्याचा निर्णय प्रशासनाने घेतला आहे. या सर्वेक्षणामुळे मालमत्तांचा बांधकाम परवानगी तपशील, क्षेत्रफळ, वापर इमारतीचा फोटो आणि मालमत्तेचा अंतर्गत नकाशा उपलब्ध होणार आहे. शिवाय महापालिका क्षेत्रांतील बेकायदा बांधकामांचा तपशिल पालिकेकडे उपलब्ध होणार आहे.
भिवंडी महापालिकेतीव सर्व मालमत्तांचे सर्वेक्षण करण्याचा उपक्रम पालिकेमार्फत सुरु करण्यात येणार आहे. यामध्ये ड्रोन तसेच तत्सम तंत्रज्ञान वापरून जीआयएस सर्वेक्षण करण्यात येणार आहे. या सर्वेक्षणादरम्यान सर्व मालमत्तांचे जिओ सिक्वेसिंग (विशिष्ट पद्धतीने क्रमांक देणे आणि जिओ रेफरसिंग (मालमत्तेचे लोकेशन ) नकाशावर नमुद करण्यात येणार आहे. तसेच मालमत्तांचे अंतर्गत मोजमाप देखील करण्यात येणार आहे. यासाठी नवी दिल्लीतील मे.सी.ई. इन्फो सिस्टम्स प्रा.लि.चे भागीदार रिप्लिट इंडिया सोलुशन प्रा.लि. यांच्याशी करार केला आहे. या सर्वेक्षणामुळे पालिका क्षेत्रातील मालमत्ताधारकांना त्यांच्या मालमत्तेची क्षेत्रफळाच्या अनुषंगाने मालमत्ता कराची आकारणी होत असल्याची खात्री करणे शक्य होणार आहे. तसेच विविध योजना त्याचप्रमाणे महत्वाकांक्षी प्रकल्प राबवण्यात येणाऱ्या अडचणी सुटणार आहेत.
---------------------------------------------
करापोटी मिळणाऱ्या उत्पन्नाची माहिती
सर्वेक्षणावेळी अधिकृत प्रतिनिधी (ओळखपत्रासह) तंत्रज्ञानासह सर्वेक्षणासाठी सर्व मालमत्तांना भेट देणार आहेत. या प्रतिनिधींना आवश्यक माहिती आणि संलग्न कागदपत्रे देऊन, तसेच मालमत्तेचे अंतर्गत मोजमाप घेण्यासाठी सहकार्य करावे, असे आवाहन पालिकेतर्फे करण्यात येत आहे. यामुळे बेकायदा बांधकामाच्या तपशिलासह मालमत्ता करापोटी मिळणाऱ्या उत्पन्नाची माहिती मिळणार आहे.
-----------------------------------------
येथे संपर्क साधण्याचे आवाहन
महापालिकेकडून देण्यात येणाऱ्या सेवा-सुविधांचे प्रभावी नियोजन करण्यासाठी मालमत्तांचे सर्वेक्षण करण्यात येत आहे. या सर्वेक्षणादरम्यान मालमत्तेची आणि नागरिकांच्या सुरक्षेला प्रथम प्राधान्य देण्यात येणार आहे. त्यामुळे काही शंका असल्यास asmtd.bncmc@gmail.com या ई-मेलवर सूचना पाठवण्याचे आवाहन महापालिकेतर्फे करण्यात आले आहे.