बोअरवेल झाली पुन्हा जिवंत

खारघर, ता. १० (बातमीदार) : खारघरमधील हेदोरावाडी पाड्यात बंद अवस्थेत असलेली बोअरवेल दोन वर्षांनी सुरू झाल्यामुळे ग्रामस्थ समाधान व्यक्त करीत आहे. गेल्या आठवड्यात ‘सकाळ’मध्ये यासंबंधी समस्या मांडण्यात आली होती. या वृत्ताची दखल घेत पनवेल महापालिकेने बंद असलेली बोअरवेल पुन्हा सुरू केली आहे.
खारघर परिसरात गेल्या अनेक दिवसांपासून कमी दाबाने पाणीपुरवठा होत असल्यामुळे रहिवाशांना टँकरची मदत घ्यावी लागत आहे. सेक्टर पाच येथील डोंगर पायथ्याशी असलेल्या हेदोरावाडी पाड्यातही हीच अवस्था होती. येथील महिलांना पाण्यासाठी पायपीट करावी लागत होती. त्यामुळे ‘सकाळ’ने ‘आदिवासी महिलांची पाण्यासाठी धावाधाव’ या मथळ्याखाली ५ मे रोजी वृत्त प्रसिद्ध करून पाण्याची समस्या मांडली होती. वृत्त प्रसिद्ध होताच पनवेल पालिकेच्या पाणीपुरवठा विभागाने हेदोरावाडी पाड्यात दोन वर्षांपासून बंद असलेली बोअरवेल सुरू केली आहे. तसेच सिडकोकडून पाणीपुरवठा सुरू केल्यामुळे ग्रामस्थ समाधान व्यक्त करीत आहेत. ग्रामस्थांकडून मिळालेल्या माहितीनुसार, गावातील पाण्‍याच्या टंचाईविषयी स्थानिक कार्यकर्त्यांना माहिती दिली; मात्र दुर्लक्ष करण्यात आले. बोअरवेल दोन वर्षांपासून बंद पडले होते. तसेच सिडकोकडून पुरेसे पाणी उपलब्ध होत नसल्यामुळे पाड्याच्या शेजारील सोसायटी, तसेच खासगी समाजमंदिर ट्रस्टकडून पाणी घेऊन गरजा पूर्ण कराव्या लागत होत्या. आता ‘सकाळ’च्या वृत्ताची दखल घेऊन पालिकेच्या पाणीपुरवठा विभागाने बोअरवेलची दुरुस्ती केली आहे. तसेच दोन दिवसांपासून सिडकोकडून पाणी उपलब्ध होत आहे. पाड्यालगत भूमिगत असलेल्या पाण्याच्या टाकीमधील बंद असलेली मोटारसुद्धा लवकरच दुरुस्त करणार असल्याचे सांगितले आहे.