स्वच्छतेसाठी जेसीबी उतरल्या नाल्यात

उल्हासनगर, ता. १० (बातमीदार) : पूरपरिस्थिती टाळण्यासाठी उल्हासनगर महापालिकेने १० तारखेपासून नालेसफाईची सुरुवात केली आहे. त्याकरिता जेसीबी मशिन्स मोठ्या नाल्यात उतरल्या आहेत. लहान नाल्यांच्या स्वच्छतेसाठी ११ हजार ५०० कामगारांचे मनुष्यबळ कामाला लागले आहेत.
शहरात ४३ मोठे नाले असून, त्यांना प्रवाहात आणण्यासाठी प्रथम या नाल्यांची सफाई करण्याचे आदेश पालिका आयुक्त मनीषा आव्हाळे यांनी दिले होते. त्यानुसार अतिरिक्त आयुक्त किशोर गवस, उपायुक्त विशाखा मोटघरे यांच्या मार्गदर्शनाखाली सहाय्यक सार्वजनिक आरोग्य अधिकारी मनीष हिवरे, मुख्य स्वच्छता निरीक्षक विनोद केणे, एकनाथ पवार यांची टीम मोठ्या नाल्यांच्या सफाईसाठी मैदानात उतरली आहे. यात चार जेसीबी, पोकलेन मशिन्सचा वापर करण्यात येणार आहे. अनेक वर्षांपासून नालेसफाईचा प्रदीर्घ अनुभव असणाऱ्या शशांक मिश्रा यांच्या शुभम कन्स्ट्रक्शन या कंपनीला हे काम देण्यात आले आहे. विशेषतः शहरातील पश्चिम भागामधील कॅम्प नंबर १ ते ३ हा परिसर खोलगट, तर कॅम्प नंबर ४ आणि ५ चा परिसर उंच भागात आहे. याशिवाय पश्चिमेला वालधुनी नदी असल्याने तेथे पूर आल्यावर आणि मोठे चॉकअप झाल्यावर पश्चिम भागातच सर्वाधिक पूरपरिस्थिती निर्माण होते. त्या अनुषंगाने पालिकेच्या सार्वजनिक आरोग्य विभागाने मोठ्या नाल्यांच्या सफाईवर लक्ष केंद्रित केले आहे.

याशिवाय शहरात लहान नाल्यांची संख्या ही बरीच आहेत. त्यांची सफाई करण्यासाठी रोजंदारीवर ११ हजार ५०० कामगार घेण्यात आले आहेत. पावसाळ्याला एक महिन्याचा कालावधी असून, तत्पूर्वीच शहरातील लहान-मोठ्या नाल्यांची सफाई पूर्ण करण्याचा मानस आहे.
- विनोद केणे, मुख्य स्वच्छता निरीक्षक