कोपरखैरणे येथे दूषित पाणीपुरवठा

नेरूळ, ता. १० (बातमीदार) : कोपरखैरणे येथील नागरिकांना दूषित पाण्याचा पुरवठा होत आहे. त्यामुळे नागरिक त्रस्त झाले आहेत. याबाबत शिवसेनेच्या ऐरोली विभागाच्या महिला जिल्हाप्रमुख शीतल कचरे यांनी आयुक्तांना पत्र देऊन समस्या दूर करण्याची मागणी केली आहे. कोपरखैरणे सेक्टर १६ येथील जय भवानी ओनर्स असोसिएशन आणि दत्तकृपा ओनर्स असोसिएशन येथील रहिवाशांना गेले चार ते पाच महिने सातत्याने दूषित पाणीपुरवठा होत आहे. त्यामुळे नागरिकांच्या आरोग्याचा प्रश्न उद्‍भवण्याची भीती आहे. आधुनिक शहरात गढूळ पाणीपुरवठा केला जात असल्याने पालिकेच्या यंत्रणेवर प्रश्नचिन्ह उपस्थित होत आहे. ही समस्या वारंवार संबंधित अधिकाऱ्यांच्या निदर्शनास आणून तक्रार करूनही अद्याप कोणतीही ठोस कार्यवाही करण्यात आली नाही.
त्यामुळे ही समस्या सोडवून रहिवाशांना दिलासा द्यावा, अशी मागणी शीतल कचरे यांनी आयुक्तांकडे केली आहे.