ठाणेकरांना ई ऑफिस प्रणालीचा ताप

ठाणेकरांना ई-ऑफिस प्रणालीचा ताप
अर्ज करण्यासाठी एक ते दीड तास रांगेत
सकळा वृत्तसेवा
ठाणे, ता. १० : प्रशासकीय कामकाज गतिमान व पारदर्शक व्हावे, यासाठी ठाणे पालिका प्रशासनाने एप्रिल महिन्यापासून ई-ऑफिस प्रणाली सुरू केली; मात्र ही प्रणाली ठाणेकरांसाठी तापदायक ठरू लागली आहे. एखादा तक्रार अर्ज किंवा निमंत्रण द्यायचे असल्यास नागरिकांना तासन्तास रांगेत उभे राहावे लागत आहे, तर दुसरीकडे कर्मचारी आणि नागरिकांमध्येदेखील अर्ज दाखल करण्यावरून खटके उडत असल्याचे दिसून येत आहे.

राज्य सरकारने राबविलेल्या मिशन १०० दिवस उपक्रमांतर्गत ई-ऑफिस कार्यप्रणाली कार्यान्वित केली आहे. या प्रणालीच्या माध्यमातून राबविले जाणारे प्रकल्प, निमंत्रण, अर्ज दाखल करता येणार आहेत. तसेच कोणत्याही कामाचा प्रस्ताव एक ते दोन दिवसात मार्गी लागण्यास मदत होणार आहे. त्यामुळे कामकाज गतिमान व पारदर्शक होण्यास मदत होत आहे. प्रत्येक प्रस्तावाला ई-नंबर दिला जाणार असून, संबंधित प्रस्ताव कोणत्या अधिकाऱ्यांच्या स्तरावर आहे किंवा त्यास विलंब झाला याचेदेखील ट्रेकिंग ठेवण्यात येणार आहे. असे असले तरी ही प्रणाली सुरू झाल्यापासून ठाणेकरांचा वेळ वाढत असल्याचे चित्र आहे. त्यातही एक अर्ज किंवा साधे निमंत्रण जरी द्यायचे झाले तरीदेखील त्यासाठी रांगेत एक ते दीड तास उभे राहावे लागत आहे.

दुसरीकडे मनसेचे संतोष निकम हे महापालिका मुख्यालयातील नागरी सुविधा केंद्रात गेले असता त्यांचा पाऊण तासाहून अधिकचा वेळ रांगेत गेलाच, शिवाय त्यांनी कर्मचाऱ्यांकडूनदेखील चुकीची वागणूक मिळाली आहे. सारखे अर्ज करून तुम्ही आमचा वेळ वाया घालवत आहात, किती अर्ज करणार आम्हाला काय तेच काम आहे का?, त्यातही संबंधित कर्मचाऱ्याला नाव विचारले असता ते तर सांगितले नाहीच, शिवाय त्याच्या गळ्यात ओळखपत्रदेखील नसल्याचे दिसून आले आहे. यासंदर्भात त्यांनी अतिरिक्त आयुक्तांकडे पत्रव्यवहार केला आहे. ई-ऑफिस प्रणालीचे काम करण्यासाठी या ठिकाणी तीन संगणक, प्रिंटर असले तरी त्या ठिकाणी काम करण्यासाठी एकच कर्मचारी असल्याचा दावा या वेळी निकम यांनी केला आहे.

ई-ऑफिस प्रणालीमुळे कामकाजात पारदर्शकता व गतिमान झाले आहे. तसेच नागरी सुविधा केंद्रात १६ जणांचे मनुष्यबळ असून, या प्रणालीमुळे नागरिकांचा वेळ वाचत आहे, परंतु अशा काही तक्रारी असतील, तर नक्कीच त्यावर उपाययोजना केल्या जातील.
- गजानन गोदेपुरे, उपायुक्त, ठाणे महापालिका.