६५६ गरीब मुलींच्या आयुष्यात चमत्कार

ठाणे शहर, ता. १० (बातमीदार)ः झोपडपट्ट्यांमध्ये राहणाऱ्या ६५६ तरुणींना ‘मॅजिक बस इंडिया फाउंडेशन’मुळे उच्च शिक्षणासाठी मदत केली जाते. त्यापैकी ४५० हून अधिक तरुणी विविध कंपन्यांमध्ये नोकरी करत असून, कुटुंबीयांच्या आर्थिक विकासाचा मार्ग बनल्या आहेत.
खेळता खेळता मुला-मुलींमध्ये शिक्षणाची आवड निर्माण करणारी सामाजिक संस्था म्हणून मॅजिक बस इंडिया फाउंडेशनची देशभरात ओळख आहे. देशभरातील २२ राज्यांमध्ये काम करत आहे. ठाण्यातील दिवा, मुंब्रा, कळवा यांसारख्या झोपडपट्ट्यांमध्ये काम करताना संस्थेने दोन वर्षांच्या कालावधीत १८ ते २५ वयोगटातील ६५६ विद्यार्थिनींना कौशल्य प्रशिक्षण आणि सामूहिक नेतृत्व कौशल्य शिकवून सबळ केले आहे. यातील ४५० हून अधिक तरुणी चांगल्या कंपनीत मोठ्या हुद्द्यावर काम करत असून, कुटुंबाचा आधार बनल्या आहेत. अनेक मुलींनी झोपडपट्टीतील घर सोडून त्यांच्या कुटुंबाला उच्चभ्रू सोसायटीत राहायला गेल्या आहेत. अनेक मुलींना गरिबीमुळे अर्धवट राहिलेले शिक्षण घेणे सुरू केले असून, अनेकांनी उच्चशिक्षित होण्यापर्यंत मजल मारली आहे.
-------------------------------
सेवा पूर्णतः मोफत
इंग्रजीमधून संवाद कौशल्य, मूलभूत साक्षरता डिजिटल, आर्थिक साक्षरता, करिअर व्यवस्थापन आणि कामाच्या ठिकाणी नीतिमत्ता यांसारख्या महत्त्वपूर्ण कौशल्यांचे मोफत प्रशिक्षण दिले जाते. सध्या रोज दोन बॅचमध्ये ६०-७० मुलींचे प्रशिक्षण सुरू असल्याची माहिती फाउंडेशनच्या वरिष्ठ संचालक प्रीती करंदीकर यांनी दिली. तसेच दिली जाणारी सेवा पूर्णतः मोफत आहे. या वेळी फाउंडेशनचे सागर सिनकर, फारूक शेख, शनिग्धा तिवारी मान्यवर उपस्थित होते.