बसमधून साडे पाच लाखांचे दागिने लंपास

नवी मुंबई, ता. १० (वार्ताहर) : बसमधील गर्दीचा फायदा उचलत काही महिलांनी एनएमएमटी बसने प्रवास करणाऱ्या एका महिलेचे पाच लाख ४० हजारांचे दागिने चोरून पलायन केल्याची घटना शुक्रवारी (ता. ९) उघडकीस आली आहे. कोपरखैरणे पोलिसांनी या घटनेतील चोर महिलांविरोधात गुन्हा दाखल करून त्यांचा शोध सुरू केला आहे.
तक्रारदार वत्सला तांडेल (५८) या उलवे भागात राहण्यास असून शुक्रवारी त्यांच्या जावयाच्या बहिणीची घणसोली गावात हळद होती. त्यामुळे वत्सला तांडेल शुक्रवारी सकाळी ११ वाजता उलवे येथून नेरूळ येथे आल्या होत्या. त्यांनी नेरूळ रेल्वेस्थानकावरून घणसोली येथे जाण्यासाठी एनएमएमटीची २० क्रमांकाची बस पकडली होती. या वेळी त्यांनी आपले पाच लाख ४० हजार रुपये किमतीचे मंगळसुत्र आणि हार आपल्या बॅगेत ठेवले होते. या प्रवासादरम्यान काही चोर महिला त्यांच्या मुलांसोबत या बसमध्ये चढल्या होत्या. बसमध्ये गर्दी असल्याने चोर महिलांनी वत्सला तांडेल यांच्या बाजूला गर्दी करून त्यांच्याजवळ बसण्यासाठी आपल्या मुलाला दिले. याच वेळी संधी साधून त्यांनी तांडेल यांच्या बॅगेतील पाच लाख ४० हजार रुपये किमतीचे दागिने चोरले. त्यानंतर त्या महिलांनी घणसोली रेल्वेस्थानकाजवळ उतरून पलायन केले.
----------------
कंडक्टरला आला संशय
काही महिला घाईगडबडीत बसमधून उतरल्याने बसमधील कंडक्टरला महिलांबाबत संशय आला. त्यामुळे त्यांनी बसमधील प्रवाशांना आपल्या वस्तू तपासण्यास सांगितले. त्यानंतर वत्सला तांडेल यांनी बॅगेमध्ये ठेवलेले आपले दागिने तपासले असता, त्यांचे दागिने चोरीला गेल्याचे त्यांच्या लक्षात आले. त्यानंतर त्यांनी कोपरखैरणे पोलिस ठाणे गाठून तक्रार दाखल केली.