आरटीई प्रवेश घेऊ इच्छिणाऱ्यांसाठी नवी संधी

आरटीई प्रवेश घेऊ इच्छिणाऱ्यांसाठी नवी संधी
महापालिकेकडून कागदपत्र तपासणीसाठी मुदतवाढ

कल्याण, ता. १० (बातमीदार) : राईट टू एज्युकेशनअंतर्गत दुर्बल घटकांतील विद्यार्थ्यांना इंग्रजी माध्यमाच्या नामांकित खासगी शाळेत मोफत प्रवेश दिला जातो. दरवर्षी २५ टक्के जागा यासाठी राखून ठेवल्या जातात. बालकांच्या सध्याच्या प्रवेश प्रक्रियेची तिसरी फेरी सुरू असून बालकांच्या प्रवेश निश्चितीसाठी अलॉटमेंट लेटर व आवश्यक कागदपत्रांची तपासणी करण्यासाठी पालकांना १४ मेपर्यंत मुदतवाढ कल्याण-डोंबिवली महापालिकेकडून देण्यात आली आहे.

आरटीईसाठीची प्रक्रिया ही १४ फेब्रुवारीपासून सुरू झाली होती. २८ एप्रिलपासून तिसऱ्या फेरीतील प्रवेशप्रक्रिया सुरू झाली. बालकांच्या प्रवेश निश्चितीसाठी अलॉटमेंट लेटर व आवश्यक कागदपत्रांची तपासणी करण्यासाठी ७ मेपर्यंत मुदत दिली होती; परंतु आता त्यात १४ मेपर्यंत वाढ करण्यात आली आहे. पालकांनी केवळ ‘एसएमएस’वर अवलंबून न राहता आरटीई पोर्टलवर अर्ज क्रमांक टाकून अर्जाची स्थिती पाहावी, असे आवाहन महापालिकेच्या शिक्षण विभागाच्या वतीने करण्यात आले आहे.

कल्याण पश्चिमेकडील सहजानंद चौकातील रामदेव हॉटेलच्या मागील झोजवाला कॉम्प्लेक्स इथल्या शिक्षण विभागाच्या कार्यालयात पडताळणी समितीकडून १४ मेपर्यंत सकाळी १० ते पाच या वेळेत कागदपत्रांची तपासणी केली जाणार आहे. निवड झालेल्या बालकांच्या पालकांनी सरकारच्या आरटीई पोर्टलवर अलॉटमेंट लेटरची प्रिंट काढावी, त्यासह प्रवेश प्रक्रियेकरिता लागणारे हमीपत्र घेऊन यावीत. ही आवश्यक कागदपत्रे मूळ प्रतीसह छायांकित प्रतींचा दोन संच घेऊन पडताळणी केंद्रावर उपस्थित राहावे, त्याची तपासणी करून बालकांचा प्रवेश निश्चित करावा, असे महापालिकेने स्पष्ट केले आहे.