खासदार संजय दिना पाटील यांची एमएमआरडीए आयुक्तांशी नागरी समस्यांवर ठोस चर्चा

खासदार संजय दिना पाटील यांची एमएमआरडीए आयुक्तांशी नागरी समस्यांवर चर्चा
मुलुंड, ता. १० (बातमीदार) ः ईशान्य मुंबईतील दीर्घकालीन नागरी समस्या आणि विकासकामांबाबत खासदार संजय दिना पाटील यांनी एमएमआरडीएचे आयुक्त डॉ. संजय मुखर्जी यांची नुकतीच भेट घेत सविस्तर चर्चा केली. विशेषतः पावसाळ्याच्या पार्श्वभूमीवर प्रलंबित नागरी विकास प्रकल्पांना गती देण्याची आवश्यकता त्यांनी अधोरेखित केली.
या बैठकीदरम्यान मेट्रो प्रकल्प क्र. चारची संथ गती, त्यामुळे निर्माण होणारी वाहतूक कोंडी, रस्त्यांची खराब स्थिती, गटारांची नियमित स्वच्छता, रस्त्यांवरील खड्डे बुजवणे, तसेच बॅरिकेड्स आणि रिफ्लेक्टर्स बसवण्यासारख्या बाबींवर चर्चा झाली. पाटील यांनी या प्रश्नांवर तातडीने उपाययोजना करण्याची मागणी केली.
याशिवाय एमएमआरडीएच्या वसाहतींमध्ये नवीन वीज मीटर बसवणे, उद्यानांचा विकास करणे आणि नटवर पारेख कंपाउंड येथील शाळा इमारतीचे काम पूर्ण करून ती पालिकेला हस्तांतरित करण्याचा मुद्दाही त्यांनी उपस्थित केला. मेट्रो प्रकल्पाच्या अंमलबजावणीसाठी एक निश्चित वेळापत्रक जाहीर करणे आवश्यक असल्याचेही त्यांनी स्पष्ट केले.
या सर्व मागण्यांचा विचार करून आयुक्तांनी संबंधित विभागांना तातडीने कार्यवाहीचे निर्देश देण्याचे आश्वासन पाटील यांना दिले.