खारघरमधील पदपथांची दुरुस्ती

खारघर, ता. ११ (बातमीदार) : खारघरमधील उत्सव चौक ते बँक ऑफ इंडिया सर्कल रस्त्याच्या दोन्ही बाजूला पालिकेकडून पदपथ दुरुस्ती तसेच सायकल ट्रॅक आणि आसन व्यवस्थेची पालिकेकडून उभारणी केली जात आहे. त्यामुळे रहिवाशांकडून समाधान व्यक्त होत आहे.
खारघर परिसरात उत्सव चौकाकडून हिरानंदानी पुलाकडे ये-जा करण्यासाठी सहा पदरी रस्ते असून, दोन्ही बाजूला मोठमोठी झाडे आहेत. रस्त्याच्या कडेला असलेल्या कट्ट्यावर अनेक नागरिक सकाळ-संध्याकाळी विसाव्यासाठी येत असतात, शिवाय बाजूला बालभारती पब्लिक स्कूल, डाकघर आणि सिडको कार्यालय, आठ ते दहा विविध बँकांचे जाळे पसरले आहे. बाजूला मोबाईल फोनची गॅलरी, हाकेच्या अंतरावर पटेल हेरिटेज आणि हिरानंदानी इमारतीत मोठ्या प्रमाणात दुकाने आणि खाद्यपदार्थांची दुकाने आहेत. त्यामुळे या परिसरात नागरिकांची वर्दळ असते. त्यामुळे पनवेल पालिकेकडून बँक ऑफ इंडिया ते उत्सव चौकदरम्यान रस्त्याच्या दोन्ही बाजूला नव्याने काँक्रीटीकरण करून पदपथ, तसेच सायकल ट्रॅक आणि झाडांच्या सावलीत नागरिकांना निवांत विसावा घेता यावा यासाठी आसन व्यवस्था तयार करण्यात येत आहे. माजी नगरसेविका हर्षदा अमर उपाध्याय यांनी तत्कालीन पालिका आयुक्त गणेश देशमुख यांना भेटून हा परिसर विकसित करण्याची मागणी केली होती.