अहिल्यानगर बसमधून सोनसाखळी चोरीला

अहिल्यानगर बसमधून सोनसाखळी चोरीला
कल्याण एसटी आगारात चोरट्यांचा सुळसुळाट
कल्याण, ता. ११ (बातमीदार) : कल्याण एसटी आगारातून बस पकडून अहिल्यानगरला जाणाऱ्या पिता-पुत्राच्या गळ्यातील सोनसाखळी एका अज्ञाताने चोरल्या आहेत. या सोनसाखळीची किंमत चार लाख ५० हजार इतकी आहे. हा प्रकार शनिवारी (ता. १०) सकाळी नऊच्या सुमारास कल्याण एसटी आगारात बसमध्ये चढल्यावर घडला आहे. या वेळी बसमध्ये असलेल्या गर्दीचा फायदा घेत चोरट्याने हे कृत्य केले. त्याच्याविरोधात महात्मा फुले चौक पोलिस ठाण्यात गुन्हा दाखल केला आहे. सुरक्षेच्या दृष्टीने बोजवारा उडालेल्या कल्याण एसटी आगारातल्या या प्रकाराने प्रवासी नाराजी व्यक्त करीत आहेत.

कल्याण एसटी आगारासाठी शनिवारचा संपूर्ण दिवस वादळी ठरला. या वादळाच्या केंद्रस्थानी अहिल्यानगर होते. कारण या दिवशी सकाळी या आगारातून अहिल्यानगर येथे जाणाऱ्या दोन प्रवाशांच्या गळ्यातल्या सोनसाखळ्या चोरट्यांनी चोरल्या. तर त्याचदिवशी संध्याकाळी अहिल्यानगरची बस वेळेत न आल्याने नाराज प्रवाशांनी गोंधळ घातला होता. यातील पहिल्या घटनेबद्दल महात्मा फुले चौक पोलिस ठाण्यात दाखल केलेल्या तक्रारीनुसार बाळू लामखडे हे आपल्या मुलासह कल्याण पश्चिमेकडील एसटी आगारातून सकाळी नऊच्या सुमारास भिवंडी ते अहिल्यानगर येथे बसने जाण्यासाठी चढले. या वेळी एका चोरट्याने बसमधील गर्दीचा फायदा घेऊन दोघा पितापुत्रांच्या गळ्यातील सोनसाखळ्या चोरल्या. यातील एक सोनसाखळी तीन तोळ्यांची तर दुसरी दोन तोळ्यांची होती. या दोन्हींची किंमत चार लाख ५० हजार असल्याचे तक्रारीत लामखडे यांनी नमूद केले आहे.