अवकाळीचा कुंभार व्यावसायिकांना फटका

अवकाळीचा कुंभार व्यावसायिकांना फटका
भिवंडी, ता. ११ (बातमीदार) : हिंदू सणांतर्गत लागणाऱ्या मातीच्या वस्तू अथवा मूर्ती यासह मार्च ते मे हे तीन महिने कुंभार समाजाच्या पिण्याच्या पाण्याचे माठ उत्पादन आणि विक्रीचा व्यावसायिक हंगाम असतो; मात्र गेल्या काही दिवसांपासून ऐन मे महिन्यात अवकाळी पाऊस सुरू झाल्याने त्याचा परिणाम कुंभार व्यवसायावर झाला आहे.

भिवंडीत तेलुगू समाज मोठ्या संख्येने असल्याने चैत्र पाडव्याच्या दिवशी दरवर्षी नवीन माठाची पूजा करून त्यामधील पाणी पिण्यास सुरुवात करतात. या दिवशी हजारोंच्या संख्येने मठाची विक्री होते. त्यामुळे भिवंडीच्या दृष्टीने उन्हाळ्याचे माठ विक्री करण्याची सुरुवात या दिवसांपासून सुरू होते. घरगुती वापरासाठी शहरातील कुटुंबे उन्हाळ्यात थंड पाणी पिण्यासाठी माठ विकत घेतात. त्याचप्रमाणे भिवंडीत सुरू असलेल्या विविध व्यवसायाच्या आस्थापनेत कामगारांना पाणी पिण्यासाठी ठिकठिकाणी माठ अथवा मोठे रांजण विकत आणतात.

मागणीत घट
यंत्रमाग कारखाने, डाइंग, सायझिंग, गोदामात लाखोंच्या संख्येने कामगार काम करीत असल्याने शहरात माठ आणि रांजण मिळून लाखाच्या संख्येने विक्री होते. एप्रिल आणि मे महिन्यात माठाची विक्री मोठ्या संख्येने असल्याने शहरातील व्यावसायिकांनी आपल्या व्यवसायाच्या ठिकाणी माठाचा साठा करून ठेवला होता. पावसाळा सुरू झाल्याने त्यांचे माठाचे ग्राहक कमी झाले, तर पाऊस झाल्याने भट्टी लावता येत नसल्याने ठाणे जिल्ह्यातील ग्रामीण भागात माठ बनविण्याचे बंद झाले. त्यामुळे उत्पादन करणारे आणि विक्री करणाऱ्या कुंभारांना या पावलाचा चांगलाच फटका बसला आहे.

मे महिन्यासाठी आम्ही माठांचा मोठा साठा केला आहे, मात्र ग्राहक नसल्याने आमचे भांडवल गुंतून राहिले असून, जागादेखील अडली आहे. त्याचबरोबर वर्षभर हा माल सांभाळावा लागणार आहे. पुढील सणाचा गणपतीच्या मूर्तीसाठी जागा शिल्लक नसल्याने अडचण निर्माण झाली आहे. एका हंगामानंतर दुसऱ्या हंगामाची आमची तयारी असते, मात्र या वेळी पावसाने आमच्या व्यवसायाचे नुकसान केले आहे.
- दिनेश गोविंद घोष्टेकर