येऊरच्या पायथ्याशी आंदोलन

सामूहिक अत्याचार प्रकरणाचा निषेध
सकाळ वृत्तसेवा
ठाणे, ता. ११ : येऊर येथे २५ वर्षीय तरुणीवर सामूहिक अत्याचार झाल्याची घटना घडली होती. या घटनेचा शनिवारी राष्ट्रवादी काँग्रेस शरद पवार गटाचे नेते जितेंद्र आव्हाड यांची कन्या नताशा यांच्यासह विविध सामाजिक संघटनेच्या कार्यकर्त्यांनी येऊरच्या मुख्य प्रवेशद्वारावर निषेध केला.
येऊर येथे दोन दिवसांपूर्वी पार्टीसाठी आलेल्या २५ वर्षीय तरुणीला मद्य पाजून तिच्यावर सामूहिक अत्याचार करण्यात आला होता. याच पार्श्वभूमीवर उद्यानातील प्रवेशद्वाराबाहेर राष्ट्रवादी काँग्रेस (शरद पवार गट) नेते जितेंद्र आव्हाड यांच्या कन्या नताशा आव्हाड यांच्यासह विविध सामाजिक संघटनेचे अजय जया यांच्यासह कार्यकर्त्यांनी आंदोलनातून निषेध केला. या वेळी ‘येऊर जंगलातील बेकायदा बांधकामांवर बुलडोझर कारवाई कधी होणार?’, ‘महिलांवर होणारे अत्याचार थांबवा’, ‘आदिवासींवरील अत्याचार थांबवा’ अशा आशयाचे फलक झळकवले. आंदोलनामुळे सायंकाळी सातनंतर उद्यान परिसरात काही जणांना रोखण्यात आले होते. यावरून काही हॉटेल मालकांसोबत आंदोलनकर्त्यांचे वादही झाले.