मासविक्री परवान्यासाठी ऑनलाइन अर्ज कर

वाशी, ता. १२ (बातमीदार) : नवी मुंबई महापालिकेने मांसविक्री परवाना प्राप्तीसाठी ऑनलाइन अर्ज करण्याचे आवाहन केले आहे. व्यावसायिकांनी मांसविक्री परवाना प्राप्तीसाठी नवी मुंबई महापालिकेच्या www.nmmc.gov.in या वेबसाईटवर ‘नागरिक सेवा’ सेक्शनमध्ये आरोग्य विभागाच्या सेक्शनला भेट देऊन ‘इमारत पूर्णत्व/भोगवटा प्रमाणपत्र’ व आवश्यक कागदपत्रांसह ऑनलाइन अर्ज करावा, असे आवाहन पालिकेच्या वतीने करण्यात आले आहे.
अनधिकृत मांसविक्री करणाऱ्या व्यावसायिकांनी व्यवसाय तत्काळ बंद करावा, असे आवाहन नवी मुंबई महापालिकेकडून करण्यात येत आहे. महाराष्ट्र महापालिका अधिनियम तरतुदीनुसार कोणत्याही व्यक्तीस किंवा संस्थेस महापालिकेच्या पूर्वपरवानगीशिवाय महापालिका कार्यक्षेत्रात खासगी कत्तलखाना उघडता येणार नाही किंवा कोणत्याही प्राण्याची मांसविक्री मानवी आहारासाठी करता येणार नाही. महसूल व वन विभागाच्या २३ एप्रिल २०२५च्या सरकारी निर्णयानुसार अनधिकृत बांधकामास आळा घालण्यासाठी आणि अनधिकृत बांधकामास प्रतिबंध करण्यासाठी ‘इमारत पूर्णत्व तथा भोगवटा प्रमाणपत्र’ सादर केल्यानंतरच त्या इमारतींमध्ये व्यवसाय परवाना देण्याचे बंधनकारक केले आहे. जरी कोणी बेकायदा मांसविक्री करीत असल्यास त्यांनी न करता परवाना प्राप्ती ऑनलाइन अर्जाद्वारे करण्याची सुविधा उपलब्ध करण्यात आलेली आहे, त्याचा लाभ घ्यावा, असे आवाहन पालिकेने केले आहे.