देवमोगरा माता दर्शन सहलीचे आयोजन

अक्षय्य तृतीयेच्या निमित्ताने धरतरी ग्रुपचे देवमोगरा माता दर्शन सहलीचे आयोजन
विक्रमगड, ता. १२ (बातमीदार) ः पालघरमधील धरतरी फाउंडेशनच्या मार्गदर्शनाखाली संस्कृती संवर्धन कार्यक्रमांतर्गत आदिवासी कुलदेवी देवमोगरा माता दर्शन सहलीचे आयोजन केले होते. धरतरी ग्रुपचे देव दर्शन सहलीचे हे दुसरे वर्ष असून, यामध्ये खुडेदपैकी वैतागवाडी, साखरे पाटीलपाडा, जांभा, शिरोशी तळेचापाडा, कऱ्हे तलावली या गावांतून वैदू भगत व इतर भाविक भक्तगण असे मिळून एकूण १९ जण सहभागी झाले होते.
देव दर्शन सहलीसाठी धरतरी ग्रुपचे हे दुसरे वर्ष असल्याने आदिवासींची कुलदेवी असलेल्या देवमोगरा माता, नाला कुंडा ही ठिकाणे गुजरातमधील नर्मदा जिल्ह्यातील सागबारा तालुक्यातील देवमोगरा या ठिकाणी आहेत, तर महाराष्ट्रातील नंदुरबार जिल्ह्यात नवापूरमध्ये बर्डीपाडा या ठिकाणी दामणदोरी या सातपुडा डोंगर रांगांच्या कुशीतदेखील देवमोगरा मातेचे मंदिर आहे. या सहलीत सहभागी झालेल्या सर्वांनी पारंपरिक तारपा वाद्याच्या सुरात देवमोगरा मातेचे दर्शन घेतले. त्यानंतर बर्डीपाडा (ता. नवापूर) येथील याहा मोगी मातेचे दर्शन घेऊन सहलीचे प्रमुख संदीप पाटारा आणि संपर्क प्रमुख किरण लोहार यांनी येथील क्षेत्राविषयी सविस्तर माहिती दिली. सहलीत सहभागी झालेल्या सर्व भाविकांना दिनकर चौधरी आणि भारत पाटारा यांनी देवमोगरा मातेच्या पावन क्षेत्राविषयी मोलाचे मार्गदर्शन केले. तसेच देवमोगरा मातेच्या परिसरातील सर्व क्षेत्राचे दर्शन घेऊन सहलीत सहभागी झालेल्या सर्वांनी मनसोक्त आनंद लुटला. या वेळी सहलप्रमुख संदीप पाटारा, संपर्कप्रमुख किरण लोहार, वैदू भगत दिनकर चौधरी, काकड्या कोंब, जाणजी लहांगे, माहू रावते आदी सर्वजण देवमोगरा मातेच्या दर्शन सहलीत सहभागी झाले होते.