उद्या दिवसभर पाणीपुरवठा बंद

तुर्भे, ता. १२ (बातमीदार) : नवी मुंबई महापालिकेच्या मोरबे जलाशयाच्या मुख्य जलवाहिनीवरील अग्रोळी पुलाजवळ रेल्वे ट्रॅकशेजारी व शिखले गावाशेजारील पुलाखालील जलवाहिनीतून वारंवार पाणीगळती होत आहे. या ठिकाणची जलवाहिनी बदलण्याचे काम बुधवारी (ता. १४) हाती घेण्यात आले आहे. त्यामुळे भोकरपाडा जलशुद्धीकरण केंद्रावरून नवी मुंबई शहराला होणारा पाणीपुरवठा बुधवारी दुपारी १२ ते गुरुवार दुपारी १२ पर्यंत २४ तास बंद ठेवण्यात येणार आहे. त्यामुळे नवी मुंबई महापालिका क्षेत्रातील बेलापूर, नेरूळ, वाशी, तुर्भे, सानपाडा, कोपरखैरणे, घणसोली, ऐरोली, तसेच कामोठे व खारघर या विभागात १४ व १५ मे रोजी दिवसभर पाणीपुरवठा होणार नाही. दुरुस्तीचे काम झाल्यानंतर गुरुवारी (ता. १५) सायंकाळी शहरात कमी दाबाने पाणीपुरवठा होईल. त्यामुळे नवी मुंबई महापालिका क्षेत्रातील नागरिकांनी या कालावधीत पाण्याचा जपून वापर करावा, असे आवाहन महापालिकेच्या पाणीपुरवठा विभागाने केले आहे.