कर्जत-चौक मार्गावर दोन कारची धडक

कर्जत, ता. १२ (बातमीदार)ः कर्जत-चौक मार्गावर वावर्ले-पाली बुद्रुकजवळ रविवारी (ता. ११) रात्री सव्वादहाच्या सुमारास दोन कारची समोरासमोर जोरदार धडक झाली. धडकेनंतर एका कारला आग लागली आणि काही क्षणांत गाडीचा भडका उडाल्‍याने कार भस्मसात झाली. अपघातात दोन्ही गाड्यांतील प्रवासी जखमी झाले आहेत. घटनास्थळी उपस्थित नागरिकांनी घटनास्‍थळी धाव घेत जखमींना जवळच्या रुग्णालयात हलवले. अपघातात दोन्ही गाड्यांचे मोठे नुकसान झाले आहे.
पाली बुद्रुकजवळ रविवारी रात्री एर्टिगा आणि इको स्पोर्ट कारची समोरासमोर जोरदार धडक झाली. अपघाताची माहिती मिळताच अग्निशमन दल आणि १०८ रुग्‍णवाहिका काही वेळात घटनास्थळी दाखल झाली; मात्र आगीच्या तीव्रतेमुळे एका गाडीने पेट घेतला. अपघातात जीवितहानी झाली नसली तरी प्रवासी गंभीर जखमी झाले. याप्रकरणी खालापूर पोलिस ठाण्यांतर्गत चौक दूरक्षेत्र पोलिस तपास करीत आहेत.

कर्जत ः अपघातानंतर एका कारने पेट घेतला.