सिडकोच्या पुनर्वसन विभागाविरोधात आंदोलन

तुर्भे, ता. १२ (बातमीदार) : राज्य सरकारने बीएमटीसी/सिडकोच्या माजी कर्मचाऱ्यांना पुनर्वसन योजनेअंतर्गत १० लाख रुपये रोख किंवा १० बाय १० फूट आकाराचा एक ओटला मंजूर केला आहे; परंतु या निर्णयास आता दोन महिने उलटून गेले असूनही संबंधित पुनर्वसन अधिकारी दुर्लक्ष करीत आहेत. त्यामुळे या अन्यायाविरुद्ध आवाज उठवण्यासाठी आणि प्रशासनाला जाग आणण्यासाठी मंगळवारी (ता. १३) बीएमटीसीचे माजी कर्मचारी शांततापूर्ण आंदोलन करणार असल्याचे जगन्नाथ पाटील यांनी सांगितले.
सिडकोच्या बंद पडलेल्या बीएमटीसी परिवहन सेवेतील कामगार मागील ४२ वर्षांपासून प्रलंबित मागण्यांकरिता सिडको व राज्य सरकारकडे लढा लढत होते. अखेर त्यांच्या मागणीला यश आल्याने नुकताच सिडकोच्या ठरावाला सरकारकडून मान्यता देण्यात आली आहे. सिडको संचालक मंडळाच्या ठरावानुसार कामगारांना गाळ्यांचे वाटप करण्यास, तसेच ज्या पात्र कर्मचाऱ्यांनी गाळ्यांऐवजी आर्थिक मोबदला देण्याची मागणी केली होती, त्‍यांना प्रत्‍येकी १० लाख रुपये देण्यास मान्यता मिळाली आहे; मात्र ठराव होऊन दोन महिन्यांचा कालावधी उलटूनदेखील अद्याप कोणत्याही प्रकारची कार्यवाही झाली नाही. त्यानुसार संतप्त कर्मचाऱ्यांकडून याबाबत वारंवार सिडकोच्या पुनर्वसन विभागाकडे पत्रव्यवहारदेखील केला आहे; मात्र कोणत्याही प्रकारची दाद मिळत नसल्याने अखेर कामगारांनी आंदोलनाचा निर्णय घेतला आहे.