नाल्यावरील स्लॅबमुळे लाखांचा दंड

सकाळ वृत्तसेवा
ठाणे, ता. १२ : शहरातील तारांगण सोसायटीजवळ नाल्यावर स्लॅब टाकण्यासाठी ठाणे पालिकेने परवानगी दिली होती. याप्रकरणी उच्च न्यायालयाने याचिकाकर्त्यांना प्रत्येकी एक लाखाचे धनादेश देण्याचे आदेश ठाणे महापालिका आयुक्त आणि विकसकाला दिले होते. त्यानुसार पालिका आयुक्त सौरभ राव यांनी याचिकाकर्त्याला एक लाखाचा धनादेश नुकताच दिला आहे.
ठाणे महापालिका प्रशासन विविध कारणांमुळे नेहमीच चर्चेत असते. सध्या एका नाल्यावर स्लॅब टाकण्यासाठी परवानगी देण्याचे प्रकरण प्रशासनाला चांगलेच महागात पडले आहे. कोरम मॉल आणि तारांगण सोसायटीजवळील सेवा रस्त्यालागत असलेल्या भूखंडाच्या ठिकाणी एका नाल्यावर स्लॅब टाकला होता. यासाठी पालिका आयुक्तांच्या परवानगीनंतर २००५ मध्ये मलनिस्सारण विभागाने विकसकाला पत्र दिले होते. यावरून नटवर पटेल यांनी उच्च न्यायालयात याचिका दाखल केली होती. त्यामुळे पालिकेला अहवाल सादर करण्याचे निर्देश न्यायालयाने दिले होते. त्यानुसार उच्च न्यायालयात अहवालही सादर केला होता, पण विकसकाने मंजूर विकास प्रस्तावामध्ये नाल्यावर स्लॅब टाकून प्रवेश दाखविला होता.
----------------------------------
अर्जाला मान्यता देणे भोवले
ठाणे महापालिकेतर्फे १५ मे २००४ रोजी बेकायदा बांधकामप्रकरणी नोटीसही बजावण्यात आली होती. १८ मे २००४ रोजी या नोटिशीला उत्तर दिले गेले. यानंतर पालिकेने ९ ऑगस्ट २००४ रोजी स्लॅब काढून टाकण्याचे आदेश दिले, पण नाल्यावरील स्लॅब नियमित करण्यासाठी केलेल्या अर्जाला आयुक्तांनी मान्यता दिली. त्यानुसार कार्यकारी अभियंत्याने विकासकाला पत्राद्वारे माहिती दिली होती.