बीपीसीएल प्रकल्पामध्ये मॉक ड्रिल

उरण, ता. १२ (वार्ताहर) : गेल्या काही दिवसांपासून भारत व पाकिस्तानदरम्यान युद्धजन्य परिस्थिती सुरू आहे. या अनुषंगाने मोठमोठ्या प्रकल्पावर कधीही हवाई हल्ला होऊ शकतो. त्यातून आपला आणि आपल्या सहकाऱ्यांचा कशाप्रकारे बचाव करू शकतो, यासाठी बीपीसीएल प्रकल्पांमध्ये सोमवारी (ता. १२) सकाळी ११.३० वाजता मॉक ड्रिल करण्यात आले.
बीपीसीएल प्रकल्पामध्ये करण्यात आलेल्या मॉक ड्रिलप्रसंगी प्रकल्पावर बॉम्ब हल्ला झाला आहे, असा प्रसंग आखण्यात आला होता. त्या वेळी कर्मचाऱ्यांनी प्रसंगावधान दाखवावे आणि आपली व आपल्या सहकाऱ्यांची सुरक्षा कशी करावी, याचे प्रात्यक्षिक दाखविण्यात आले. आपत्कालीन परिस्थितीत सज्जता कशी असावी, याचे खरेखुरे प्रात्यक्षिक मॉक ड्रिलमध्ये दाखविण्यात आले. तसेच बॉम्ब हल्ला झाला तर घरामध्ये भिंतीला चिकटून राहावे, शक्यतो काचेजवळ उभे न राहता बाजूला राहावे, कारण काचा फुटून अपघात होऊ शकतो, असा प्रकारचे मार्गदर्शन करण्यात आले. मॉक ड्रिलसाठी कंपनीचे व्यवस्थापक विश्वजित चौधरी यांच्या मार्गदर्शनाखाली सहाय्यक उपनियंत्रक शशिकांत शिरसाट यांच्या सहकार्याने २५ होमगार्ड, २३ नागरी संरक्षण दलाचे कर्मचारी, पोलिस अधिकारी आणि कर्मचारी, १३७ कामगारांची टीम तयार करण्यात आली होती.
-----------------
खरेखुरे प्रात्यक्षिक
प्रात्यक्षिकामध्ये प्रथम बॉम्ब हल्ला केला गेला. त्यानंतर लगेचच दोन मिनिटांनी सायरन वाजविण्यात आले. त्यानंतर तातडीने पोलिस, नागरी संरक्षण दल, अग्निशमन दल, रुग्णवाहिका, आरोग्य विभागाच्या गाड्या कंपनी परिसरात दाखल झाल्या. अग्निशमन दलाने आग विझवली. अडकलेल्या कामगारांना बाहेर काढले आणि जखमी कामगारांना ताबडतोब रुग्णवाहिकेतून उपचारासाठी नेण्यात आले. लोकांचे मनोधैर्य वाढविण्याचे काम करण्यात आले.