महामानवाच्या विचारांना उजाळा

सकाळ वृत्तसेवा
ठाणे, ता.१२ : महापालिका आणि भारतरत्न डॉ. बाबासाहेब आंबेडकर जयंती उत्सव समिती, ठाणे शहर यांच्या संयुक्त विद्यमाने भारतरत्न डॉ. बाबासाहेब आंबेडकर यांचा जयंती उत्सव मोठ्या उत्साहात करण्यात आला. यानिमित्ताने काढलेल्या रॅलीची कोर्ट नाका येथे सांगता झाली.
ठाणे स्थानकातील भारतरत्न डॉ. बाबासाहेब आंबेडकर यांच्या पूर्णाकृती पुतळ्याला समितीचे अध्यक्ष भास्कर वाघमारे, ठाणे महापालिकेचे उपायुक्त शंकर पाटोळे आणि दिनेश तायडे, वाहतूक पोलिस विभागाचे सहाय्यक आयुक्त भोसले, ठाणे शहर पत्रकार संघाचे अध्यक्ष आनंद कांबळे यांच्या हस्ते पुष्पहार अर्पण करण्यात आला. त्यानंतर, मासुदा तलाव येथे छत्रपती शिवाजी महाराज यांच्या अश्वारूढ पुतळ्यापर्यंत भेट देण्यात आली. ठाणे महापालिकेचे माजी स्थायी समिती सभापती भय्या इंदिसे, समितीचे सरचिटणीस संजय भालेराव, समिती सदस्य प्रमोद इंगळे, सहाय्यक आयुक्त दिनेश वाघमारे यांच्या हस्ते पुष्पहार अर्पण करण्यात आला. त्यानंतर, मिरवणुकीची कोर्ट नाका येथे सांगता झाली.
................
‘जलसा’तून अभिवादन
कोर्ट नाका येथे, रात्री ८ च्या दरम्यान शाहीर संभाजी भगत यांच्या जलसा कार्यक्रमात, भारतरत्न डॉ. बाबासाहेब आंबेडकर यांचे विचार, त्यांच्या आठवणी यांना उजाळा देण्यात आला. तसेच गाणी, प्रबोधन जलसाच्या माध्यमातून संभाजी भगत यांनी यावेळी केले.