
भिवंडी, ता. १३ (बातमीदार): अंबाडी परिसरातील तलाठी, मंडळ कार्यालयासोबत असलेले झुणका भाकर केंद्र तोडून खासगी कार्यालय थाटण्यात आले आहे. या प्रकरणात जिल्हा परिषद गटाचे माजी सदस्याने पदाचा दुरुपयोग करून अतिक्रमण केल्याची तक्रार स्थानिकांनी केली आहे, पण महसूल विभागाकडून कोणतीही कारवाई करण्यात आली नसल्याने बेकायदा अतिक्रमणांना अभय दिल्याची चर्चा आहे.
माजी जिल्हा परिषद सदस्य कैलास जाधव यांनी सरकारी जागेवर केलेल्या अतिक्रमणाविरोधात अंबाडी ग्रामपंचायतीचे सदस्य तथा ठाकरे गटाचे शिवसेना उपतालुकाप्रमुख संतोष गोविंद पाटील यांनी भिवंडी तहसीलदार आणि विरोधी पक्षनेते अंबादास दानवेंकडे तक्रार केली आहे. त्यानुसार स्थानिक मंडळ अधिकारी यांनी भिवंडी तहसीलदारांना दिलेल्या अहवालात मौजे झिडके येथील स.नं.९२ क्षेत्र ०.१२.० हे. आर जमीन ७/१२ च्या भोगवटादार सदरी खाणीकडे अशी नोंद दाखल आहे. या सर्व्हे नंबरच्या हक्कात तलाठी कार्यालय व मंडळ अधिकारी कार्यालय, अशी नोंद आहे. त्यानुसार अंबाडी तलाठी कार्यालय तोडून घराकडे जाण्यासाठीचा रस्ता तयार केला आहे. तसेच झुणका भाकर केंद्र पाडून तेथे कैलास जाधव यांचे जनसंपर्क कार्यालय उभारले आहे.
---------------------------------------------------
नोटिशीला दोन महिने पूर्ण
महाराष्ट्र विधान परिषदेचे विरोधी पक्षनेते अंबादास दानवे यांनी राज्याच्या महसूल विभागाच्या अप्पर मुख्य सचिवांना लेखी तक्रार केली आहे, तर भिवंडीचे तहसीलदार अभिजित खोले यांनी २० मार्च २०२५ रोजी कैलास दत्तात्रेय जाधव यांना नोटीस बजावून अतिक्रमण काढण्यास सांगितले आहे. या नोटिशीमध्ये भोगवटादार यांना दोन दिवसांच्या आत अतिक्रमण जागेबाबत पुरावा सादर करण्याचे नमूद आहे, पण दोन महिने पूर्ण होऊन याबाबतची फौजदारी अथवा अतिक्रमण निष्कासनाची कारवाई तहसील कार्यालयातून झालेली नाही.
--------------------------------------------
तहसीलदारांच्या भूमिकेकडे लक्ष
अंबाडीच्या सरकारी जागेवरील अतिक्रमण हटवले नसल्याने भिवंडी तहसील कार्यालय संशयाच्या फेऱ्यात आहे. तहसीलदार अभिजित खोले यांनी महसुली कार्यालयाच्या जागेवरील अतिक्रमणावर कारवाई करणार की नोटिशीनुसार कारवाई करणार, हे स्पष्ट करण्याची विनंती तक्रारदार संतोष पाटील यांनी केली आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.