उपजिल्हा रुग्णालयातील परिचारिकांचा सत्कार

उपजिल्हा रुग्णालयातील परिचारिकांचा सत्कार
माणगाव, ता. १३ (बातमीदार) ः सामाजिक उपक्रमात रायगड जिल्ह्यात नावलौकिक कमविलेल्या माणगाव शिवजयंती उत्सव व रक्तदान शिबिर सेवाभावी संस्थेतर्फे आंतरराष्ट्रीय परिचारिकादिनानिमित्त उपजिल्हा रुग्णालय माणगाव येथील परिचारिकांचा सत्कार करण्यात आला. या कार्यक्रमास संस्थेचे संस्थापक अध्यक्ष सलीम शेख, कार्याध्यक्ष तथा राजिपचे माजी शिक्षण व आरोग्य समिती सभापती ज्ञानदेव पवार, उपजिल्हा रुग्णालयाच्या वैद्यकीय अधीक्षक डॉ. अरुणा पोहरे, वैद्यकीय अधिकारी डॉ. दीपक देशमुख, सामाजिक कार्यकर्ते संजय गांधी आदींसह उपजिल्हा रुग्णालयातील कर्मचारी व परिचारिका मोठ्या संख्येने उपस्थित होते. आधुनिक नर्सिंगच्या प्रणेत्या फ्लोरेन्स नाइटिंगेल यांच्या जयंतीनिमित्त दरवर्षी १२ मे हा दिवस आंतरराष्ट्रीय परिचारिकादिन म्हणून साजरा केला जातो. माणगाव उपजिल्हा रुग्णालयात दरवर्षी हा दिवस मोठ्या उत्साहात साजरा केला जातो. यावर्षीही रुग्णालयाच्या वैद्यकीय अधीक्षक अरुणा पोहरे यांच्या प्रमुख उपस्थितीत केक कापून आंतरराष्ट्रीय परिचारिकादिन उत्साहात साजरा करण्यात आला. या कार्यक्रमात उपजिल्हा रुग्णालय माणगाव या ठिकाणी उपजिल्हा रुग्णालयातील सहाय्यक अधिसेविका लता राठोड, परिसेविक शिवकांती गवळी, अर्चना मोकाशी, तेजस्विनी सुखदरे, सानिका पवार, अस्मिता तांबडे आदी परिचारिकांचा माणगाव शिवजयंती उत्सव व रक्तदान शिबिर सेवाभावी संस्थेतर्फे सत्कार करण्यात आला. या कार्यक्रमाच्या सुरुवातीला आधुनिक नर्सिंगच्या प्रणेत्या फ्लोरेन्स नाइटिंगेल यांच्या जयंतीनिमित्त त्यांच्या प्रतिमेला पुष्पहार अर्पण करण्यात आला. त्यानंतर भारत-पाक युद्धातील भारतीय शहीद जवानांना श्रद्धांजली अर्पण करण्यात आली.