एनएचएमच्या ३४,५०० कर्मचाऱ्यांना पगार नाही

एनएचएमच्या ३४,५०० कर्मचाऱ्यांना पगार नाही
१४ मेपासून आमरण उपोषणाचा इशारा
सकाळ वृत्तसेवा
मुंबई, ता. १३ : राष्ट्रीय आरोग्य अभियानांतर्गत (एनएचएम) राज्यभरात कार्यरत असलेल्या ३४ हजार ५०० वैद्यकीय अधिकारी व कर्मचाऱ्यांना गेल्या चार महिन्यांपासून वेतन मिळालेले नाही. जानेवारीपासून वेतन थांबले असून, हे कर्मचारी आर्थिक संकटात सापडले आहेत. त्‍यामुळे संतप्त कर्मचाऱ्यांनी राज्य सरकारला १३ मेपर्यंत मागण्या मान्य करण्यासाठी अल्टिमेटम दिला आहे. अन्यथा १४ मेपासून सातारा येथून राज्यभर आमरण उपोषण सुरू करण्याचा इशारा दिला आहे.
या कर्मचाऱ्यांमध्ये वैद्यकीय अधिकारी, परिचारिका, फार्मासिस्ट, प्रयोगशाळा तंत्रज्ञ आणि इतर तांत्रिक कर्मचारी यांचा समावेश आहे. त्यांच्या प्रलंबित वेतनासह पगारवाढ, समायोजन व बदली या मागण्याही प्रलंबित आहेत. यासंदर्भात राष्ट्रीय आरोग्य अभियान अधिकारी व कर्मचारी एकता संघाचे अध्यक्ष विजय गायकवाड यांनी राज्य सरकारकडे तत्काळ हस्तक्षेपाची मागणी केली आहे.
७ ते १३ मे यादरम्यान या कर्मचाऱ्यांनी सामूहिक रजा घेतली असून, १३ मेपर्यंत मागण्या मान्य न झाल्यास १४ तारखेपासून टप्प्याटप्प्याने आमरण उपोषण सुरू होणार आहे. या मागण्यांसाठी खासदार, आमदार आणि मंत्र्यांना निवेदन देण्यात येणार आहे.
या उपोषणामुळे बालक व महिलांचे आरोग्य तपासणी, लसीकरण, पोषण, माता-बाल आरोग्यसेवा, गरोदर मातांची तपासणी, कुटुंब कल्याण योजना, असंसर्गजन्य रोग प्रतिबंध आणि आपत्कालीन सेवा यासारख्या अनेक महत्त्वाच्या आरोग्यसेवा ठप्प होण्याचा धोका निर्माण झाला आहे. राज्य सरकारने याकडे गांभीर्याने लक्ष देत तातडीने पावले उचलावी, अशी मागणी कर्मचारी संघटनांनी केली आहे.