जांभळी नाक्यावर आवाजाचा ठसका

ठाणे, ता. १३ (बातमीदार)ः शहरातील जांभळी नाका येथे मसाले मार्केटमधील सात मसाला मिल ध्वनी प्रदूषणामुळे महापालिकेने ३० तारखेपासून बंद केल्या आहेत. त्यामुळे सध्या एकच मिल सुरू असल्याने सकाळपासूनच ग्राहकांच्या लांबच लांब रांगा लागत आहेत.
ठाणे महापालिका क्षेत्रातील जांभळी नाका परिसर मसाला मिलसाठी प्रसिद्ध आहे. शहरातील विविध भागांतून येथे मोठ्या संख्येने ग्राहक मसाला तयार करण्यासाठी येत असतात. त्यामुळे हा परिसर नेहमीच गजबजलेला असतो. अशातच आवाजाच्या त्रासामुळे या परिसरातील तब्बल सात मसाला मिल बंद करण्यात आल्या आहेत. त्यामुळे मसाला बनवण्यासाठी येणाऱ्या महिलांना विविध अडचणींना सामोरे जावे लागत आहे. सध्या एकच मिल सुरू असल्याने ग्राहकांना सकाळपासून रांगेत उभे राहावे लागते. गर्दीमुळे वृद्ध, महिला आणि लहान मुलांना विशेष त्रास होत आहे. मसाला केवळ भाजून देणाऱ्या दुकानांची संख्या वाढली असली, तरी मसाला दळणारी सुविधा एकाच ठिकाणी उपलब्ध असल्यामुळे ताण अधिक वाढला आहे.
-----------------------------------------
कचऱ्याच्या दुर्गंधीने हैराण
महापालिकेने या परिसरात नाल्याच्या सफाईमुळे दुर्गंधी पसरलेली आहे. त्यात सध्या पावसाळ्यापूर्वी कामे सुरू असल्याने वारंवार वीजपुरवठा खंडित होत असल्याने मशीन बंद पडते. त्यामुळे ग्राहकांना सकाळी सातपासून नंबर लावावा लागतो, पण कचऱ्याच्या दुर्गंधीमुळे रांगेत उभे राहणे शक्य नसल्याने स्थानिक प्रशासनाने तत्काळ याकडे लक्ष द्यावे, अशी मागणी नागरिकांमधून होत आहे.