बीएमटीसी कामगारांचे सिडकोवर आंदोलन

तुर्भे, ता. १३ (बातमीदार) : बीएमटीसी कर्मचारी आणि त्यांच्या वारसांना १० लाखांचा आर्थिक मोबदला देण्याचा निर्णय सिडकोने घेऊन त्यास संचालक मंडळाने मंजुरी दिली आहे; परंतु दोन महिने उलटूनदेखील अद्याप अंमलबजावणी न झाल्याने हवालदिल झालेल्या कर्मचाऱ्यांनी मंगळवारी (ता. १३) सिडकोवर मोर्चा काढला. मोर्चात दोनशेहून अधिक माजी कर्मचारी व त्यांचे वारस सहभागी झाले होते.
बीएमटीसी कर्मचाऱ्यांना किंवा त्यांच्या वारसांना पुनर्वसन पॅकेज म्हणून प्रत्येक कर्मचारी किंवा त्यांच्या वारसाला शंभर चौरस फुटांचा भूखंड किंवा गाळा देण्याचा यापूर्वी निर्णय झाला होता. भूखंड, गाळ्याला काही कामगारांनी व त्यांच्या वारसांनी विरोध दर्शविला होता. त्यामुळे सिडकोने १५८ कोटी ७० लाख रुपयांचे आर्थिक पॅकेज तयार केले. या मॉडेलला संचालक मंडळाने मंजुरीदेखील दिली आहे. त्यानुसार बीएमटीसीचे १,५८७ कामगार आणि त्यांच्या वारसांना १० लाखांचे थेट अनुदान दिले जाणार आहे; मात्र दोन महिने होऊनदेखील अंमलबजावणी झाली नाही. त्यामुळे सिडकोचे लक्ष वेधण्यासाठी सिडकोच्या पुनर्वसन विभागावर हल्लाबोल आंदोलन करण्यात आले. या वेळी आंदोलनकर्त्यांनी सिडको पुनर्वसन अधिकारी प्रदीप नलावडे यांची भेट घेऊन त्यांना मागणीचे निवेदन दिले. नलावडे यांनी येत्या मिटिंगमध्ये विषय मांडला जाणार असल्याचे आश्वासन दिले असल्याचे जगन्नाथ पाटील यांनी सांगितले.