नेरूळमधील वाइन शॉप जाळण्याचा प्रयत्न

नवी मुंबई, ता. १३ (वार्ताहर) : अज्ञात व्यक्तीने नेरूळ सेक्टर १० मधील वाइन शॉपवर ज्वलनशील पदार्थ टाकून वाइन शॉप जाळून टाकण्याचा प्रयत्न केल्याची घटना रविवारी (ता. ११) मध्यरात्री घडली. अग्निशमन दलाने घटनास्थळी धाव घेऊन येथील आग तत्काळ आटोक्यात आणल्याने वाइन शॉप थोडक्यात वाचले. नेरूळ पोलिसांनी याप्रकरणी अज्ञात व्यक्तीचा शोध सुरू केला आहे.
नेरूळ सेक्टर १० मधील दत्तकृपा या इमारतीत योगेश वाइन शॉप हे मद्यविक्रीचे दुकान असून, रविवारी मध्यरात्री दीड वाजण्याच्या सुमारास आग लागली होती. त्या वेळी शेजाऱ्यांनी याबाबतची माहिती अग्निशमन दलाला दिल्यानंतर अग्निशमन दलाच्या जवानांनी तत्काळ घटनास्थळी धाव घेऊन या दुकानाला लागलेली आग आटोक्यात आणली. त्यामुळे या दुकानाचे किरकोळ स्वरूपाचे नुकसान झाले; मात्र त्यानंतर दुकानमालकाने त्यांच्या दुकानाला आग कशी लागली याचा शोध घेण्यासाठी सीसीटीव्ही फुटेजची तपासणी केली.
------------------
सीसीटीव्हीत आग लावल्याचे उघड
सीसीटीव्हीच्या तपासणीत रविवारी मध्यरात्री दीड वाजण्याच्या सुमारास अंगात काळ्या रंगाचे जॅकेट व तोंडाला मास्क व डोक्यावर टोपी घातलेल्या एका अज्ञात व्यक्तीने प्लॅस्टिक बाटलीमधून आणलेले ज्वलनशील पदार्थ योगेश वाइनच्या शटरवर टाकून आगपेटीने आग लावत असल्याचे त्यात दिसून आले. दुकानाला आग लागल्यानंतर त्या व्यक्तीने पलायन केल्याचे निदर्शनास आले. त्यानंतर योगेश वाइनच्या मालकाने नेरूळ पोलिस ठाण्यात तक्रार दाखल केली आहे. त्यानुसार नेरूळ पोलिसांनी अज्ञात व्यक्तीचा शोध सुरू केला आहे.