सातवर्षीय मुलीवर लैंगिक अत्याचार

नवी मुंबई, ता. १४ (वार्ताहर) : नांदेड येथून घणसोली येथील नातेवाइकांकडे आलेल्या एका १७ वर्षीय अल्पवयीन मुलाने घरामध्ये टीव्ही पाहण्यासाठी आलेल्या एका सातवर्षीय मुलीवर लैंगिक अत्याचार केल्याचा प्रकार मंगळवारी (ता. १३) उघडकीस आला आहे. रबाळे पोलिसांनी या प्रकरणातील अल्पवयीन मुलाविरोधात गुन्हा दाखल केला आहे.
गुन्हा दाखल करण्यात आलेला १७ वर्षीय मुलगा नांदेड जिल्ह्यातील असून त्याचे नातेवाईक घणसोली येथे राहण्यास आहेत. त्यामुळे गेल्या काही दिवसांपूर्वीच हा अल्पवयीन मुलगा घणसोली येथे नातेवाइकांकडे राहण्यास आला होता. मंगळवारी दुपारी १२ वाजण्याच्या सुमारास या नातेवाइकाच्या शेजारी राहणारी सातवर्षीय मुलगी त्यांच्या घरी टीव्हीवर कार्टून बघण्यासाठी आली होती. त्या वेळी अल्पवयीन मुलाने पीडित मुलीला घरातील बाथरूममध्ये नेऊन तिच्यावर लैंगिक अत्याचार केले. त्यानंतर त्याने या प्रकाराची माहिती कुणालाही न सांगण्याबाबत पीडित मुलीला बजावले; मात्र या प्रकारानंतर घाबरलेल्या मुलीने घडल्या प्रकाराची माहिती आपल्या आईला दिली. त्यानंतर पीडित मुलीच्या आईने रबाळे पोलिस ठाण्यात तक्रार दाखल केली. त्यानुसार पोलिसांनी अल्पवयीन मुलाविरोधात गुन्हा दाखल करून त्याच्यावर पुढील कारवाई सुरू केली आहे.