‘जे.जे.’च्या कामाला गती देण्याचे आदेश

जे. जे. रुग्णालयाच्या कामाला गती द्या
राज्यमंत्री माधुरी मिसाळ यांचे आदेश

मुंबई, १४ : जे. जे. रुग्णालयास सुपरस्पेशालिटी रुग्णालय बनवण्याच्या कामास गती द्यावी. यामुळे अनेक वैद्यकीय सुविधा एकाच ठिकाणी मिळणार असून, गरजू रुग्णांना याचा लाभ घेता येणार आहे. ऑक्टोबरपर्यंत काम पूर्ण करण्याच्या दृष्टीने नियोजन करा, असे निर्देश राज्यमंत्री माधुरी मिसाळ यांनी मंगळवारी (ता. १३) दिले.
माधुरी मिसाळ यांनी रुग्णालयाची पाहणी करून आढावा बैठक घेतली. त्या वेळी त्या बोलत होत्या. या वेळी सचिव धीरज कुमार, आयुक्त राजीव निवतकर, संचालक डॉ. अजय चंदनवाले, अधिष्ठाता डॉ. अजय भंडारवार, अधीक्षक डॉ. संजय सुरासे तसेच इतर अधिकारी आणि कर्मचारी उपस्थित होते. राज्यमंत्री मिसाळ यांनी कार्डिओ, मज्जातंतू शल्यचिकित्सा, जनरल सर्जरी, अतिदक्षता विभाग, नर्सिंग होम आदी विभागांची पाहणी केली. त्यांनी या विभागांमध्ये रुग्णांसाठी वापरण्यात येणाऱ्या आधुनिक उपकरणांची माहिती घेतली. तसेच रुग्णालयातील डॉक्टर व कर्मचाऱ्यांच्या तक्रारींचे निवारण, रिक्त पदांची भरती व डॉक्टरांसाठी हॉस्टेल सुविधा याबाबतही त्यांनी आढावा घेतला. रुग्णालयातील अन्न गुणवत्तेची पडताळणी, स्कॅनिंग सुविधा, ऑपरेशन थिएटर व शस्त्रक्रियेसाठी आवश्यक साहित्याच्या उपलब्धतेबाबतही संबंधित अधिकाऱ्यांशी चर्चा केली. बदलत्या काळानुसार वैद्यकीय शिक्षण घेणाऱ्या विद्यार्थ्यांच्या गरजांकडे विशेष लक्ष देऊन त्यांना उत्तम सुविधा पुरविण्यासंदर्भात सूचना दिल्या.