रिक्षाचालकाने चाकूच्या धाकाने तरुणाला लुटले

पनवेल, ता. १४ (वार्ताहर) : तळोजा भागात एका रिक्षाचालकाने व त्याच्या दोघा साथीदारांनी रिक्षामध्ये प्रवासी म्हणून बसलेल्या तरुणाला चाकूचा धाक दाखवून, तसेच त्याला मारहाण करून त्याच्याजवळ असलेला मोबाईल फोन आणि रोख रक्कम लुटून पलायन केल्याची घटना सोमवारी (ता. १२) रात्री घडली. तळोजा पोलिसांनी या प्रकरणातील अज्ञात रिक्षाचालक व त्याच्या दोघा साथीदारांविरोधात जबरी चोरीचा गुन्हा दाखल करून त्यांचा शोध सुरू केला आहे.
तक्रारदार तरुण मिथून प्रेम चव्हाण (१९) हा तळोजा येथील घोट गाव येथे राहण्यास आहे. सोमवारी रात्री १०.३० वाजण्याच्या सुमारास तो रिक्षामधून आपल्या घरी जात होता. नितळस ते कल्याणकडे जाणाऱ्या रस्त्यावरून रिक्षा जात असताना निप्पॉन कंपनीलगतच्या मोकळ्या जागेमध्ये रिक्षाचालकाने रिक्षा थांबवल्यानंतर रिक्षाचालक व रिक्षामधील त्याच्या इतर दोघा साथीदारांनी मिथूनला मारहाण केली. त्यानंतर त्या लुटारूंनी मिथूनला चाकूचा धाक दाखवून त्याचा मोबाईल फोन आणि रोख रक्कम लुटून त्याला त्याच ठिकाणी सोडून पलायन केले. या प्रकारानंतर मिथुनने आपले घर गाठले. त्यानंतर दुसऱ्या दिवशी त्याने तळोजा पोलिस ठाण्यात तक्रार दाखल केली. त्यानुसार पोलिसांनी अज्ञात रिक्षाचालक व त्याच्या दोघा साथीदारांविरोधात जबरी चोरीचा गुन्हा दाखल करून त्यांचा शोध सुरू केला आहे.