अवकाळी पावसाने मुरबाडला झोडपले

मुरबाड, ता. १४ (वार्ताहर)ः वादळी वाऱ्यासह आलेल्या पावसाने मुरबाड गावाला सलग दुसऱ्या दिवशी झोडपले. दुपारनंतर अचानक आलेल्या पावसाने ग्रामस्थांची चांगलीच धावपळ उडवली. यापूर्वी अवकाळी पावसाने परिसरात हजेरी लावली होती.
ग्रामीण तसेच शहरी भागात बुधवारी (ता. १४) संध्याकाळी चारच्या सुमारास अवकाळी पावसाने जोरदार हजेरी लावली. अचानक आलेल्या पावसाने नागरिकांची तारांबळ उडाली. पावसाचा मुक्काम वाढवल्याने हळदी व लग्न समारंभातील उत्साहावर विरजण फेरले. लग्नाच्या मंडपाचे मोठ्या प्रमाणात नुकसान झाले आहे. महत्त्वाचे म्हणजे, पूर्वी लग्नाचे मुहूर्त सकाळी असायचे; परंतु दोन वर्षांपासून संध्याकाळी लग्नसोहळे होत आहेत; पण आता संध्याकाळीच पाऊस हजेरी लावत असल्याने लग्न समारंभातील उत्साहावर पाणी फेरले आहे.