नाल्यातील गाळ पसरला रस्त्यावर

रस्त्यावरील गाळामुळे अपघाताचा धोका
सकाळ वृत्तसेवा
डोंबिवली, ता. १५ : पावसाळ्याच्या पार्श्वभूमीवर कल्याण-डोंबिवलीतील नालेसफाई व गाळ काढण्याचे काम सुरू आहे; मात्र नाल्यातील गाळ काढून तो रस्त्यावरच टाकण्यात येत असल्याने गाळ रस्त्यावर पसरून वाहनांसाठी अपघातांचे निमित्त ठरत आहे. एमआयडीसी निवासी भागातील रस्त्यांच्या कडेला काढण्यात आलेला गाळ रस्त्यावर पसरला आहे. गाळाने माखलेल्या या रस्त्यावरून वाहने घसरत आहेत.

नाल्यांत साचणारा कचरा, गाळ यामुळे पहिल्या पावसात पाण्याच्या प्रवाहाला अडथळा निर्माण होऊन पाणी अडते, हे पाणी शहरात घुसून मग पूरस्थिती निर्माण होते. पुरामुळे नागरिकांना अनेक समस्यांना तोंड द्यावे लागते. ही परिस्थिती उद्भवू नये म्हणून दरवर्षी पावसाळ्याआधी नालेसफाईचे कंत्राट देत नाल्यातील गाळ, कचरा काढला जातो. नालेसफाईची कामे ३१ मेपर्यंत पूर्ण करणे अपेक्षित आहे; मात्र अद्याप ती पूर्ण झालेली नाहीत.

पूरस्थिती निर्माण होणारा परिसर तसेच मुख्य दर्शनी भागातील नालेसफाईवर प्रशासनाने जोर दिला आहे. त्याअंतर्गत नाल्यात मात्र आजही गाळ व कचरा जशाचा तसा असल्याचे दिसून येते. लहानसहान गटारांतदेखील प्लॅस्टिक, डेब्रिजचा कचरा पडलेला दिसून येत आहे. मजुरांच्या मदतीने छोट्या गटारातील गाळ, कचरा काढण्यात आला आहे; मात्र तो ठरावीक ठिकाणचाच साफ केलेला दिसून येतो. नागरिक दररोज घरातील कचरा हा लहान गटारे, नाल्यांत टाकत असल्याने कचरा कमी होण्याऐवजी वाढत आहे.

दुर्गंधीमुळे नागरिक त्रस्त
१५-२० दिवस हा गाळ उचलला जात नसल्याने दुर्गंधीमुळे नागरिक, दुकानदार त्रस्त झाले आहेत. त्यातच वाहनांमुळे गाळ रस्त्यावर पसरून आणखी घाणीचे साम्राज्य निर्माण होते. डोंबिवली एमआयडीसी परिसरातील मोठ्या नाल्यातील गाळ अशाच प्रकारे रस्त्याच्या कडेला काढून टाकण्यात आला आहे. हा गाळ मोठ्या स्वरुपात असून, तो सध्याच्या घडीला रस्त्यावर इतस्ततः पसरला आहे. चिकट स्वरूपाच्या या गाळामुळे वाहने घसरून अपघात होण्याचे प्रमाण वाढले आहे. यामुळे येथून जाताना वाहनचालकांना वाहने हळू चालवा, अशी सूचना वाहनचालकच एकमेकांना देत आहेत.