कल्याण आगारात चोरांचा सुळसुळाट

कल्याण आगारात चोरांचा सुळसुळाट
आठवडाभरात नऊ लाखांचे दागिने लंपास
सकाळ वृत्तसेवा
डोंबिवली, ता. १५ : एसटी महामंडळाच्या कल्याण आणि विठ्ठलवाडी बस आगारात चोरट्यांनी धुमाकूळ घातला आहे. लग्नसराईचा हंगाम, तसेच शाळांना सुट्टी असल्याने अनेक नागरिक गावी प्रवास करीत असतात. या काळात एसटीला गर्दी असते. या गर्दीचा फायदा घेत चोरट्यांनी प्रवाशांच्या बॅग, दागिने, मोबाईलला लक्ष्य केले आहे. गेल्या आठवडाभरात या दोन आगारांतून चार ते पाच प्रवाशांचा लाखो रुपयांचा ऐवज चोरीला गेला आहे. याप्रकरणी पोलिस ठाण्यात तक्रार दाखल केली आहे. पोलिसांचा तपास सुरू असून आगारात सीसीटीव्ही, सुरक्षा रक्षक नसल्याने या चोरांना आळा घालणे शक्य नाही. एसटी महामंडळाच्या हलगर्जीमुळे प्रवासी संताप व्यक्त करीत आहेत.

बदलापूरचे प्रकाश नलावडे मंगळवारी (ता. १३) विठ्ठलवाडी आगारातून प्रवास करीत होते. या वेळी त्यांच्याजवळील ८५ हजार रुपये रक्कम असलेली पिशवी चोरीला गेली. त्यांनी याप्रकरणी कोळसेवाडी पोलिस ठाण्यात तक्रार दाखल केली आहे. दुसऱ्या घटनेत, कल्याण पश्चिम आरटीओ कार्यालयाजवळ राहणारे विजय उबाळे (६४) हे शनिवारी सकाळी बसमध्ये चढत असताना त्यांच्या गळ्यातील एक लाख ६५ हजार रुपयांची सोनसाखळी चोरट्यांनी लंपास केली. त्यांनी महात्मा फुले पोलिस ठाण्यात तक्रार नोंदवली आहे. तिसऱ्या घटनेत, पालघर येथील किराणा दुकानदार बाळू लामखडे हे कुटुंबीयांसह कल्याण बस आगारातून बसमध्ये चढत असताना त्यांच्या आणि मुलाच्या गळ्यातील साडेचार लाखांचे सोन्याचे दागिने चोरीस गेले आहेत. ही तक्रारही महात्मा फुले पोलिस ठाण्यात दाखल आहे.

प्रशासनाच्या उदासीनतेमुळे नाराजी
पुण्याच्या प्रकरणानंतर बसस्थानकातील सुरक्षा वाढवल्याचा दावा करण्यात आला होता. प्रवाशांच्या म्हणण्यानुसार या आगारांत ना सीसीटीव्ही यंत्रणा आहे ना सुरक्षा रक्षक आहे. यामुळे चोरांचा येथे कायम सुळसुळाट असतो. चोरीचे प्रमाण रोखणे यामुळे अशक्य झाले आहे. नागरिकांनी या पार्श्वभूमीवर त्वरित सुरक्षा उपाययोजना राबवण्याची जोरदार मागणी केली आहे. पोलिसांकडून तपास सुरू असला तरी एसटी प्रशासनाच्या उदासीनतेमुळे प्रवासी संतप्त झाले आहेत.