उरणमध्ये पावसाळापूर्व कामांना वेग

उरण, ता. १५ (वार्ताहर) : पावसाळापूर्व कामांमध्ये प्रामुख्याने नालेसफाईची कामे केली जातात. त्यामुळे उरण नगरपालिकेनेही मॉन्सूनपूर्व नालेसफाईला सुरुवात केली आहे. सुरुवातीला मुख्य नाल्यांमधील गाळ व कचरा काढला जात आहे. यासाठी जवळपास १८ लाखांची निविदा काढण्यात आली असून, ठेकेदारमार्फत हे काम केले जात असल्याची माहिती शहर अभियंता निखिल धोरे यांनी दिली.
अवघ्या अडीच ते तीन किलोमीटर परिघात वसलेल्या आणि सहा किलोमीटर अंतराचे नाले असलेल्या उरण शहरातील नालेसफाईसाठी दरवर्षी लाखो रुपयांचा खर्च करून नालेसफाईची कामे करूनही शहरातील रस्त्यावरून मात्र पावसाचे धो-धो पाणी वाहत असते. यामुळे नागरिकांना रस्त्यावर चालणेही अवघड होते. उरण नगरपालिका प्रशासनाकडून शहरातील दादर नाला, कुंभारवाडा, कामठा, भिवंडीवाला गार्डन या मुख्य नाल्यांची सफाई ठेकेदारामार्फत करण्यात येत आहे. द्रोणागिरी डोंगराकडून येणारे पाणी मुख्य नाल्याकडून थेट कोळीवाडामार्गे समुद्रात जात आहे. त्यामुळे त्या नाल्याची सफाई प्रथम केली जात आहे.
-------------------
शहरात लहान-मोठे २५ नाले
उरण शहर परिसरातील कोटनाका ते मोरा, चारफाटा आनंदनगर ते मुस्लिम मोहल्ला, कोळीवाडा, बौद्धवाडा, वैष्णवी हॉटेल ते कुंभारवाडा, बोरीपाखाडी, द्रोणागिरी बाजार या परिसरात लहान-मोठे २५ नाले आहेत. पूरस्थितीपासून उरण शहरवासीयांची सुटका होण्यासाठी नगरपालिकेकडून दरवर्षी मॉन्सूनपूर्व नालेसफाई करण्यात येते; मात्र यावर्षी मे अर्धा संपल्यानंतर नगरपालिकेने नालेसफाईला सुरुवात केली आहे. त्यामुळे यावर्षी नालेसफाईनंतर नागरिकांची पुरापासून सुटका होईल का, असा प्रश्न उपस्थित होत आहे.