कल्याणमध्ये ‘हा खेळ सावल्यांचा’ कार्यक्रम

कल्याणमध्ये ‘हा खेळ सावल्यांचा’ कार्यक्रम
कल्याण, ता. १५ (बातमीदार) : कधीही साथ न सोडणारी सावली येत्या शनिवारी (ता. १७) काही काळासाठी आपली साथ सोडणार आहे. सुभेदार वाडा कट्टा आणि आकाश मित्र मंडळ यांच्या वतीने शून्य सावली दिनानिमित्त हा खेळ सावल्यांचा कार्यक्रम आयोजित केला गेला आहे. या वेळी खगोल अभ्यासक हेमंत मोने उपस्थितांना मार्गदर्शन करणार आहेत. शनिवारी दुपारी ११.३० ते १२.४० वाजताच्या दरम्यान कल्याण (प.) येथील सुभाष मैदानात होणार आहे.

शून्य सावली दिवस हा सर्वांच्या कुतूहलाचा विषय आहे. कायम सोबत असणारी सावलीदेखील शून्य सावलीच्या दिवशी काही वेळासाठी नाहिशी होते. ही सावली पाहण्यासाठी अनेक खगोलप्रेमी या दिवसाची वाट पाहात असतात. वर्षात दोनदा शून्य सावलीचा योग असतो. दरवर्षी हा योग पाहण्यासाठी खगोलप्रेमी उत्सुक असतात. यंदा १७ मे रोजी हा दिवस अनुभवता येणार आहे. शून्य सावली संकल्पना म्हणजे नक्की काय याबाबत नागरिकांना माहिती मिळावी, यासाठी सुभेदार वाडा कट्टा आणि आकाश मित्र मंडळ यांच्या वतीने कार्यक्रमाचे आयोजन करण्यात आले आहे. या वेळी खगोल अभ्यासक हेमंत मोने उपस्थितांना मार्गदर्शन करतील. तरी सर्वांनी या शून्य सावलीचा अनुभव घेण्यासाठी मैदानात उपस्थित राहावे, असे संस्थांच्या वतीने आवाहन करण्यात आले आहे.

सावली गायब का होते?
मकर वृत्त आणि कर्कवृत्त प्रदेशात दोन वेळा शून्य सावलीचा अनुभव घेता येतो. शून्य सावली योग ही वर्षातून दोनदा घडणारी भौगोलिक घटना आहे. स्थळांचे अक्षांश आणि सूर्याची क्रांती समान झाली, तर मध्यान्हकाळी सूर्य डोक्यावर असतो. त्या वेळी आपली सावली काही वेळासाठी दिसेनाशी होते, त्यालाच शून्य सावली दिवस म्हटले जाते.