शाळाप्रवेश नवीन गणवेशात

सकाळ वृत्तसेवा
ठाणे, ता. १५ : महापालिकेच्या शाळांमधील गणवेशाची निविदा प्रक्रिया राबविण्यास गेली दोन वर्षे निवडणुकांमुळे विलंब झाला होता. त्यामुळे शाळा सुरू होऊनही विद्यार्थ्यांना गणवेश मिळाले नव्हते. पण यंदा जूनमध्येच विद्यार्थ्यांना गणवेश मिळावेत, यासाठी शिक्षण विभाग कामाला लागले असून, निविदा प्रक्रिया संदर्भातील प्रस्ताव मंजुरीसाठी पाठवण्यात आला आहे. त्यामुळे नवीन गणवेशात विद्यार्थ्यांचा शाळाप्रवेश होणार आहे.
ठाणे महापालिकेच्या प्राथमिक १०५ आणि माध्यमिक २३ अशा मिळून १२८ शाळा आहेत. या शाळांमधून सद्यःस्थितीत ३० हजारांच्या आसपास विद्यार्थी शिक्षण घेत आहेत. या विद्यार्थ्यांना शैक्षणिक साहित्यासह गणवेश महापालिका प्रशासनाकडून देण्यात येतो. विद्यार्थ्यांना डीबीटी पद्धतीनुसार गणवेश उपलब्ध होत होते. त्यानुसार विद्यार्थ्यांनी गणवेश घ्यायचा आणि त्याचे देयके शाळेला सादर करायचे होते. त्यानंतर पैसे पालकांच्या खात्यात जमा होत होते, मात्र २०१९ पासून डीबीटीची प्रक्रिया बंद होऊन पालिकेच्या शिक्षण विभागाच्या माध्यमातून गणवेशासाठी निविदा प्रक्रिया राबविण्यास सुरुवात केली आहे, पण लोकसभेपाठोपाठ विधानसभा निवडणुकांमुळे दोन वर्षांपासून निविदा प्रक्रिया विलंबाने होत होती.
-------------------------------
सात कोटींची आर्थिक तरतूद
- विद्यार्थ्यांना जूनमध्येच गणवेश मिळावेत, यासाठी पालिकेच्या शिक्षण विभागाने पावले उचलण्यास सुरुवात केली आहे. गणवेश खरेदीसंदर्भातील निविदा प्रक्रिया राबवण्यासाठीचा प्रस्ताव तयार करून पालिका आयुक्तांच्या मंजुरीसाठी पाठवण्यात आला आहे.
- ठाणे महापालिकेच्या इयत्ता १ ली ते १० वी मध्ये जवळपास ३० हजार विद्यार्थी शिक्षण घेत आहेत. या विद्यार्थ्यांच्या गणवेश खरेदीसाठी यंदा सात कोटींची आर्थिक तरतूद प्रशासनाकडून करण्यात आली आहे. या विद्यार्थ्यांना जूनमध्येच गणवेश मिळणार असल्याचा दावा पालिकेने केला आहे.