संभाजी महाराज जन्मोत्सव साजरा

तुर्भे, ता. १५ (बातमीदार) : धर्मवीर प्रतिष्ठानच्या वतीने छत्रपती संभाजी महाराज यांचा जन्मोत्सव सोहळा जुईनगर येथे मोठ्या उत्साहात साजरा करण्यात आला. प्रारंभी सकाळी किल्ले पुरंदर येथे गडपूजन करून ज्योत प्रज्ज्वलित करून ज्योत जुईनगरमधील गावदेवी चौक येथील श्री संभाजी महाराज जन्मोत्सव सोहळ्या ठिकाणी आणण्यात आली. या वेळी ज्योतीचे विधिवत पूजन करण्यात आले. त्यानंतर छत्रपती संभाजी महाराज यांचा अभिषेक व प्रतिमा पूजन करण्यात आले. सायंकाळी ऐतिहासिक मर्दानी खेळांची प्रात्यक्षिके सादर करण्यात आली. त्यानंतर महाआरती करण्यात आली. माजी नगरसेवक रंगनाथ औटी यांनी छत्रपती संभाजी महाराज यांचा पराक्रम नव्या पिढीसाठी प्रेरणादायी असल्याचे सांगितले. कार्यक्रमाला विजय माने, दिलीप घोडेकर, शशिकला औटी, संतोष सुतार, प्रदीप पाटील यांच्यासह शिवप्रेमी नागरिक, महिला उपस्थित होत्या. जन्मोत्सव सोहळा यशस्वी करण्यासाठी अध्यक्ष प्रशांत गोरडे, सचिव अतुल शेवाळे, खजिनदार संकेत आहेर, अक्षय शिंगटे, दिनेश बांगर, योगेश एकावडे आदींनी सहकार्य केले.