अवैध रेती वाहतूक

ठाण्यात बेकायदा रेती वाहतूक
तहसील विभागाकडून कारवाईचा बडगा
सकाळ वृत्तसेवा
ठाणे, ता. १६ : ठाणे रेतीबंदर येथे बेकायदा रेती उपसा व त्याची वाहतूक करणाऱ्यांविरोधात ठाणे तहसील कार्यालयाने कारवाईचा बडगा उगारला आहे. त्यानुसार गुरुवारी (ता. १५) रात्री उशिरा रेती वाहतूक करणाऱ्या एक ट्रकसह एक जेसीबी आणि दोन दुचाकी असा ८० लाखांचा मुद्देमाल जप्त केल्याची कारवाई करण्यात आली आहे. याप्रकरणी मुंब्रा पोलिस ठाण्यात गुन्हा दाखल करण्यात आला असल्याची माहिती तहसीलदार कार्यालयाच्या वतीने देण्यात आली.
ठाणे जिल्ह्यातील नदी आणि खाडीपात्रात वाळूमाफियांकडून मोठ्या प्रमाणात बेकायदा रेती उपसा करण्यात येतो. या पार्श्वभूमीवर खारेगाव परिसरात रेती वाहतूक करणाऱ्या माफियांविरोधात उपविभागीय अधिकारी उर्मिला पाटील यांच्या मार्गदर्शनाखाली तहसीलदार उमेश पाटील, मंडळ अधिकारी बाळकूम शशिकांत जगताप, सहाय्यक महसूल अधिकारी जीवन ससाने यांच्या पथकाने रेतीबंदर भागात रात्री अचानक धाड टाकली. या वेळी रेती वाहतुकीसाठी वापरण्यात येणारा ट्रक, एक जेसीबी आणि दोन मोटारसायकल असा ८० लाखांचा ऐवज जप्त करण्यात आला असून, याप्रकरणी मुंब्रा पोलिस ठाण्यात गुन्हा दाखल केला आहे. ठाणे तालुक्यात ज्या ठिकाणी बेकायदा रेती उपसा व वाहतूक करणाऱ्यांविरोधात यापुढेही अशीच कारवाई करण्यात येणार असल्याची माहिती तहसीलदार उमेश पाटील यांनी दिली.