डेंगी निवारणासाठी पनवेल पालिका तत्पर

पनवेल, ता. १८ (बातमीदार) : राष्ट्रीय डेंगीदिनानिमित्त पनवेल महापालिकेच्या वतीने डेंगी प्रतिबंधात्मक उपाययोजनांची अमंलबजावणी करण्यासाठी आयुक्त मंगेश चितळे यांच्या मार्गदर्शनाखाली शुक्रवारी (ता. १६) स्वच्छता विभागाच्या कर्मचाऱ्यांना आरोग्य विभागाच्या वतीने प्रशिक्षण देण्यात आले.
उपायुक्त डॉ. वैभव विधाते यांच्या सूचनेनुसार घेण्यात आलेल्या या प्रशिक्षण कार्यक्रमांतर्गत मुख्य वैद्यकीय अधिकारी डॉ. आनंद गोसावी यांच्या नेतृत्वाखाली हे प्रशिक्षण घेण्यात आले. या प्रशिक्षण कार्यक्रमांतर्गत स्वच्छता कर्मचाऱ्यांना डास उत्पत्ती ठिकाणे कशी ओळखावी, ती नष्ट करण्याबाबत व पुन्हा तयार होऊ नयेत, याची पीपीटीच्या माध्यमातून माहिती देण्यात आली. तसेच बांधकाम क्षेत्राच्या ठिकाणी घेण्याविषयीची काळजी, धूर फवारणी, औषध फवारणी याबाबत मार्गदर्शन करण्यात आले. याचबरोबर औषध फवारणीची पद्धत, घरांमधील सर्व्हे याबाबतही या वेळी मार्गदर्शन करण्यात आले. महाविद्यालये, भाजी मंडई अशा विविध ठिकाणी परिचारिका व कर्मचाऱ्यांच्या माध्यमातून जनजागृती उपक्रम राबविण्यात येणार आहेत. या वेळी साथरोग वैद्यकीय अधिकारी डॉ. आकाश ठसाळ, घनकचरा व स्वच्छता विभागप्रमुख अनिल कोकरे, वैद्यकीय अधिकारी, स्वच्छता निरीक्षक संजय जाधव, आरोग्य पर्यवेक्षक प्रमोद गिरी उपस्थित होते.
---------------------
खबरदारी हाच उपाय
डेंगी हा डासांमुळे होणारा आजार आहे. त्याचा प्रादुर्भाव रोखण्यासाठी नागरिकांनी स्वच्छता राखणे, पाणी साठू न देणे, घरातील व घराबाहेरील जागा स्वच्छ ठेवणे, पाणी साठवणाऱ्या वस्तूंना झाकून ठेवणे अशा उपाययोजना राबवण्याचे आवाहन प्रशासनाने केले आहे. डेंगीवर नियंत्रण मिळवण्यासाठी प्रशासन आणि नागरिकांनी एकत्र येऊन दक्षता घेतल्यास या आजाराला आपण नक्कीच आळा घालू शकतो.