मुंबई सेंट्रल स्थानकात देशातील पहिले रेल्वे ‘डिजिटल लाउंज’

मुंबई सेंट्रल स्थानकात देशातील पहिले रेल्वे ‘डिजिटल लाउंज’
पश्चिम रेल्वेचा अभिनव उपक्रम; १,७१२ चौरस फूट जागेत २.७१ कोटींची गुंतवणूक
सकाळ वृत्तसेवा
मुंबई, ता. १८ : देशातील पहिले डिजिटल लाउंज आता लवकरच मुंबईत सुरू होणार आहे. पश्चिम रेल्वेने यासाठी पुढाकार घेतला असून, मुंबई सेंट्रल स्थानकावर १,७१२ चौरस फूट जागेत आधुनिक डिजिटल लाउंज आणि को-वर्किंग स्पेस विकसित केली जाणार आहे. सुमारे २.७१ कोटी रुपये खर्च करून उभारल्या जाणाऱ्या या सुविधेमुळे प्रवाशांना विमानतळासारखी अत्याधुनिक सेवा मिळणार आहे.
रेल्वे स्थानकांवर प्रवाशांना केवळ प्रतीक्षा करण्यापुरतीच जागा उपलब्ध असते. दरम्यान, बदलत्या काळाच्या गरजेनुसार आता रेल्वे प्रवासासाठी येणाऱ्या तरुण, व्यावसायिक, विद्यार्थी व फ्रीलान्सर व्यक्तींनाही कामासाठी सुसज्ज आणि शांत जागेची आवश्यकता आहे. ही गरज ओळखून पश्चिम रेल्वेने ‘डिजिटल लाउंज’ची संकल्पना पुढे आणली आहे. हे लाउंज म्हणजेच एक स्मार्ट को-वर्किंग स्पेस असून, येथे प्रवाशांसाठी आणि सर्वसामान्य नागरिकांसाठीही विविध सुविधा उपलब्ध असतील. यामध्ये मोफत वीज आणि वायफाय, चार्जिंग पॉइंटसह टेबल व खुर्ची, आरामदायी सोफासेट, कॅफे आणि शांततेत काम करण्यासाठी योग्य वातावरण असणार आहे.

प्रवाशांसह सर्वांसाठी खुले
या लाउंजचा वापर केवळ रेल्वे प्रवासीच नव्हे, तर मुंबईत राहणारे फ्रीलान्सर, वर्क फ्रॉम होम करणारे व्यावसायिक, महाविद्यालयीन विद्यार्थीही करू शकणार आहेत. घरात अनुकूल वातावरण न मिळणाऱ्या अनेकांना स्थानकातच एक कार्यक्षम कामाची जागा उपलब्ध होणार आहे.  

५० लाख रुपयांचे उत्पन्न
या लाउंजमधून दरवर्षी सुमारे ५० लाख रुपयांचे उत्पन्न मिळण्याचा अंदाज रेल्वे प्रशासनाने व्यक्त केला आहे. या सुविधेमुळे रेल्वे स्थानकाचा उपयोग केवळ प्रवासापुरता न राहता एक ‘वर्क हब’ म्हणूनही होणार आहे.