मेफोड्रोन अमली पदार्थासह आरोपी अटकेत

कल्याण, ता. १८ (वार्ताहर) : कल्याण व डोंबिवली शहर परिसरात अमली पदार्थ विक्री करणाऱ्यावर कठोर कारवाई करत परिमंडळ ३ कल्याणचे पोलिस उपायुक्त अतुल झेंडे यांच्या विशेष पथकाने आणि खडकपाडा पोलिस ठाण्याने संयुक्त कारवाई केली. खडकपाडा पोलिस ठाण्याच्या हद्दीत ९० फुटी रोडवरील अटाळी आंबिवली जाणाऱ्या कच्च्या रस्त्यावर शनिवारी (ता. १७) ८.१५ वाजता ही कारवाई पार पडली.
या कारवाईदरम्यान गुलाम मोसन खान ऊर्फ इराणी (३५) याच्याकडून २९ ग्रॅम वजनाचा मेफोड्रोन अमली पदार्थ जप्त करण्यात आला. याची अंदाजे किंमत ५६ हजार रुपये असून, पोलिसांनी आरोपीला अटक केली आहे. याप्रकरणी खडकपाडा पोलिस ठाण्यात अमली पदार्थविरोधी कायद्यांतर्गत गुन्हा दाखल केला आहे. इराणीवर यापूर्वीही खडकपाडा, महात्मा फुले चौक आणि नारपोली पोलिस ठाण्यात विविध गंभीर गुन्ह्याची नोंद आहे. ही कारवाई परिमंडळ ३ कल्याणच्या विशेष पथक व खडकपाडा पोलिस ठाण्याच्या संयुक्त प्रयत्नातून करण्यात आली आहे. अशा कृत्यावर कारवाई पुढेही चालू राहणार असल्याची माहिती पोलिसांनी दिली आहे.