मच्छीमारांचे कोट्यवधी रुपये थकले

उरण, ता. १९ (वार्ताहर) : व्यापाऱ्यांनी मासळीविक्रीचे कोट्यवधी रुपये थकवल्याने करंजा बंदरातील मच्छीमारांवर आर्थिक संकट कोसळले आहे. यामध्ये सुमारे १५ कोटी रुपयांची रक्कम थकीत असल्याचे बोलले जात आहे. त्यामुळे येत्या काळात मच्छीमार व्यवसाय कसा करावा, असा प्रश्न मच्छीमारांना पडला आहे. यापैकी काही मच्छीमारांनी उरण पोलिस ठाण्यात मासळी खरेदीदारांच्या विरोधात तक्रारी दाखल केल्या आहेत.
मुंबई येथील ससून डॉकला पर्याय म्हणून उरण तालुक्यातील करंजा बंदर निर्माण केले आहे. करंजा बंदरातच येथील मच्छीमारांच्या मासळीची विक्री होत आहे. त्यामुळे भाव आणि वजन यात मुंबईपेक्षा फरक पडत आहे. याचा फायदा मच्छीमारांना होत आहे. मासेमारी करून आलेल्या बोटीतील टनावारी मासळीची खरेदी-विक्री हा खरेदीदारांच्या आणि विक्री करणाऱ्या मच्छीमारांमधील विश्वासाचा नियमितचा व्यवहार आहे. या विश्वासावर कोट्यवधी रुपयांच्या मासळीची विक्री होत आहे. असा व्यवहार मागील अनेक वर्षांपासून सातत्याने सुरू आहे. करंजा बंदरातून थेट मासळीचा व्यवहार सुरू झाल्यानंतर खरेदीदारांकडून मोठमोठ्या रकमा थकविण्यास सुरुवात झाली आहे. त्यामुळे पुढील मासेमारी करण्यासाठी लागणारी रक्कम मच्छीमारांकडे उपलब्ध नाही. परिणामी अनेक मच्छीमारांवर आर्थिक संकट ओढवले आहे.
------------------
जागेवरच खरेदीचा व्यापाऱ्यांना फायदा
अवघ्या १० दिवसांनंतर दोन महिन्यांच्या मासेमारीबंदीचा कालावधी सुरू होणार आहे. त्यानंतर दोन महिने व्यवसाय करता येत नाही. जागेवरच खरेदी होत असल्यामुळे मासळीच्या वजनात घट होत नाही. त्यामुळे मापात पाप होत नाही. येथील मासळीला भावही उत्तम मिळत आहे; मात्र अनेकांच्या थकीत रकमा वाढल्या आहेत. त्यामुळे व्यवसाय कसा करावा, असा प्रश्न करंजा मच्छीमार सहकारी संस्थेचे चेअरमन प्रदीप नाखवा यांनी केला आहे.