रायगड, नवी मुंबईत ड्रोन कॅमेऱ्यांना बंदी

उरण, ता. १९ (वार्ताहर) : पहलगाम दहशतवादी हल्ल्याच्या पार्श्वभूमीवर सुरक्षिततेच्या दृष्टीने संपूर्ण रायगड जिल्ह्यात, तसेच संपूर्ण नवी मुंबईत ड्रोन बंदी आदेश देण्यात आले आहेत. सागरी किनाऱ्यावर हे आदेश कायम असतात; मात्र पहलगाम येथील हल्ल्यानंतरची परिस्थिती पाहता सुरक्षा म्हणून संपूर्ण रायगड जिल्ह्यात व नवी मुंबई आयुक्तालय क्षेत्रात ३ जूनपर्यंत बंदी घालण्यात आली आहे. या आदेशाचे काटेकोर पालन करण्याचे आदेश देण्यात आले आहेत.
महाराष्ट्राला ७२० किलोमीटरचा सागरी किनारा लाभला असून नवी मुंबई पोलिस आयुक्तालय क्षेत्रात ११० किलोमीटर सागरी किनारा आहे. यात ऐरोली ते वाशी, करावे, एनआरआय, खारघर, उरण ते घारापुरी लेणी हा परिसर नवी मुंबई पोलिस आयुक्तालय क्षेत्रात येतो. या क्षेत्रात ड्रोन कॅमेरा बंदी कायम असते; मात्र पहलगाम हल्ल्यानंतर पूर्ण पोलिस आयुक्तालय क्षेत्रात ड्रोन कॅमेराला बंदी घालण्यात आली आहे. हा आदेश १५ मे पासून ३ जून रात्री १२ वाजेपर्यंत लागू करण्यात आला आहे. कोणत्याही व्यक्तीने या आदेशाचे उल्लंघन केले तर त्यांच्यावर कारवाई करण्यात येईल, असे आयुक्तालयातर्फे सांगण्यात आले आहे.