मासळी बाजाराचे काम दिवाळीपर्यंत सेवेत

खारघर, ता. २० (बातमीदार) : पनवेल पालिकेच्या माध्यमातून खारघर सेक्टर १२ येथे जवळपास पाच कोटी रुपये खर्च करून उभारण्यात येत असलेल्या मासळी बाजाराचे काम सुरू झाले आहे. येत्या दिवाळीपर्यंत हे काम पूर्ण होऊन बाजार वापरासाठी खुला होणार असल्याचे पालिकेकडून सांगण्यात येत आहे.
सिडकोने खारघरमध्ये मासळी व भाजी बाजारासाठी भूखंड उपलब्ध करून दिला आहे; मात्र एकही भाजी आणि मासळी मार्केट उभारले नाही. दरम्यान, सेक्टर २० मध्ये मोकळ्या भूखंडावर उभारण्यात आलेल्या चिकन, मटण आणि मासळी बाजारातून पसरणाऱ्या दुर्गंधीमुळे रहिवासी त्रस्त होते. ही बाब माजी स्थायी समिती सभापती प्रवीण पाटील यांनी माजी सभागृह नेते परेश ठाकूर यांच्या निदर्शनास आणून दिल्यावर ठाकूर यांनी पाहणी करून अनेक वर्षांपासून व्यवसाय करणाऱ्या चिकन, मासळी विक्रेत्यांना बाजार उभारून न्याय दिला जाईल, असे आश्वासन देण्यात आले होते. दरम्यान, विधानसभा निवडणुकीपूर्वी खारघर सेक्टर १२ येथील गावदेवी मैदानासमोर सिडकोकडून उपलब्ध झालेल्या भूखंडावर उभारण्यात येणाऱ्या मासळी बाजाराचे भूमिपूजन आमदार प्रशांत ठाकूर यांच्या हस्ते झाले होते. जवळपास पाच कोटी रुपये खर्च करून उभारण्यात येत असलेल्या बाजाराचे काम एक वर्षात पूर्ण करण्यात यावे, अशी सूचना पालिकेने केली आहे. त्यामुळे दिवाळीपूर्वी बाजाराचे काम पूर्ण होण्याच्या दिशेने ठेकेदाराकडून काम सुरू असल्याचे दिसून येते.