सरकारी जमिनीवरी अतिक्रमणावर हातोडा

सकाळ इफेक्ट
सरकारी जमिनीवरील अतिक्रमणावर हातोडा
भिवंडी-वाडा मार्गावरील व्यापारी गाळे हटविणार
भिवंडी, ता. २० (बातमीदार) : भिवंडी तालुक्यातील भिवंडी-वाडा मार्गावरील अंबाडी नाक्यावर असलेल्या महसूल विभागाच्या जागेवर अतिक्रमण करून व्यावसायिक गाळे बांधण्यात आले आहेत. नागरिकांच्या सोयीसाठी असलेले तलाठी व मंडळ अधिकाऱ्यांचे कार्यालय तोडून त्या ठिकाणी अतिक्रमण करण्यात आले होते. याबाबतचे प्रकरण ‘सकाळ’ने उघड केल्यानंतर तालुका महसूल यंत्रणा खडबडून जागी झाली असून, हे व्यापारी गाळे तोडण्यासाठी हालचाली सुरू झाल्या आहेत. तत्पूर्वी सरकारी कार्यालये पडल्याचा मंडळ अधिकाऱ्यांचा अहवाल असताना अजून वरिष्ठांनी फौजदारी गुन्हा दाखल करण्याचे आदेश का पारित केले नाहीत? याबाबत नागरिकांमध्ये आश्चर्य व्यक्त केले जात आहे.
भिवंडी तालुक्यातील मौजे झिडके येथील जमिनीमध्ये तलाठी कार्यालय व मंडळ अधिकारी कार्यालय अशी नोंद दाखल आहे. या ठिकाणी असलेली सरकारी जुनी कार्यालये तोडून माजी जिल्हा परिषद सदस्य तथा सध्याचे भाजप कार्यकर्ते यांनी या जागेवर काही वर्षांपूर्वी व्यापारीकरणासाठी दुकान गाळे बांधलेले होते व ते भाड्याने दिलेले आहेत. या जागेत असलेलं झुणका भाकर केंद्र पाडून तेथे कैलास जाधव यांचे छत्रपती जनसंपर्क कार्यालयाचे बांधकाम केलेले आहे.
--------------------------------------
फौजदारी गुन्हा का नाही
मौजे अंबाडी येथील जमिनीवर कैलास दत्तात्रय जाधव यांनी फळझाडे लावली आहेत. तसेच या जागेत त्यांचे १) शंतपर २) दत्तमंदिर ३) समर्थ पोलिक्राफ्ट एल एल पी अशी बांधकामे असल्याचे अंबाडी मंडळ अधिकारी कार्यालयाने तहसीलदारांच्या निदर्शनास आणून दिलेले आहे. या अहवालाच्या अनुषंगाने अद्याप सरकारी बांधकाम पाडल्याप्रकरणी व सरकारी इमारतीची नासधूस केल्याप्रकरणी संबंधितांवर वरिष्ठांनी फौजदारी गुन्हा का नोंदविला नाही, असा सवालही उपस्थित करण्यात आला आहे.
------------------------
तलहसीलदारांच्या हालचाली सुरू
‘सकाळ’मध्ये आलेल्या बातमीची दखल घेत तहसीलदार अभिजित खोले यांनी सरकारी जागेवरील अतिक्रमण हालचाली सुरू केल्या असून, सात दिवसांत सरकारी जागेवरील अतिक्रमण हटविण्यासाठी नोटीस बजावण्यात आल्या आहेत. सात दिवसांत हे अतिक्रमण न काढल्यास महसूल विभागामार्फत काढण्यात येणार असल्याचे तहसीलदारांनी सांगितले.