शहापूर -भिवंडी तालुक्यात वीज पुरवठा खंडित

शहापूर, भिवंडी तालुक्यात वीजपुरवठा खंडित
सलग सहा दिवस नागरिक अंधारात, जनजीवन विस्कळित

वासिंद, ता. २० (बातमीदार) : शहापूर, भिवंडी या तालुक्यांच्या वेशीवर असलेल्या गावपाड्यांमध्ये महावितरणच्या हलगर्जीमुळे अंधाराचे साम्राज्य पसरले आहे. गेल्या सहा दिवसांपासून महावितरणच्या अधिकाऱ्यांना बिघाड सापडत नसल्यामुळे पावसाळ्याच्या सुरुवातीलाच महावितरणचा भोंगळ कारभार चव्हाट्यावर आला आहे. यामुळे नागरिकांची गैरसोय झाली आहे.
पच्छापूर, जांभीवली, पिवळी परिसरात शेतीला जोडधंदा म्हणून पशुपालन, कुक्कुटपालन मोठ्या प्रमाणात केले जाते. त्याचबरोबर या परिसरात वीटभट्ट्यांचेदेखील प्रमाण अधिक आहे. या वीजटंचाईमुळे नागरिकांचे प्रचंड नुकसान झाले आहे.
ग्रामीण भागात गेल्या सहा दिवसांपासून वीज गायब आहे. यामुळे नळपाणी पुरवठा खंडित झाला आहे. पाण्याची सोय नसल्याने
महिलांना पाण्यासाठी पायपीठ करावी लागत आहे. अति उष्णतेमुळे व पाण्याअभावी कोंबड्यांचाही मृत्यू होत आहे.
प्राथमिक आरोग्य केंद्रातही वीज नसल्याने गरोदर महिला, उपचारासाठी दाखल केलेल्या लहान मुलांना त्याचा फटका बसत आहे. मोबाईल चार्जिंगसाठी वासिंदसारख्या ठिकाणी येऊन चार्जिंग करावे लागत आहे.

महावितरणच्या अधिकारी व कर्मचाऱ्यांकडून ही समस्या सोडवण्यासाठी प्रयत्न सुरू आहेत, मात्र अजूनही बिघाड कुठे झाला आहे ते ठिकाण सापडलेले नाही. यासाठी वरिष्ठ कार्यालयाकडून मनुष्यबळ मागवण्यात आले आहे. सध्या जांभिवलीपर्यंत वीजपुरवठा सुरू असून, लवकरच येथील वीज समस्या सोडवली जाणार असल्याचे महावितरणच्या अधिकाऱ्यांनी सांगितले.