खंडित वीजपुरवठ्याने कोपरखैरणेवासीय त्रस्त

खंडित वीजपुरवठ्याने कोपरखैरणेवासीय त्रस्त
वाशी, ता. २२ (बातमीदार) ः कोपरखैरणे सेक्टर १७ व १८ येथील रहिवासी नियमित पावसाळा सुरू होण्याआधीच वारंवार होणाऱ्या खंडित वीजपुरवठ्याने हैराण झाले आहेत. त्‍यामुळे महावितरणकडून या वीजपुरवठ्याकडे लक्ष देण्यात यावे, अशी मागणी रहिवाशांकडून करण्यात येत आहे.
मंगळवारी (ता. २०) रात्री ८ च्या सुमारास कोपरखैरणे सेक्टर-१८ येथील गार्डनजवळ विद्युत वाहिनीचा शॉर्टसर्किटमुळे स्फोट होऊन येथील सुमारे २०० खोल्यांचा वीजपुरवठा खंडित झाला. त्‍यानंतर महावितरणतर्फे उशिरा दुरुस्ती सुरू करण्यात आल्यामुळे रात्री दोन वाजता वीजपुरवठा सुरळीत झाला. त्‍यामुळे विजेचा खोळंबा झाल्याने नागरिक त्रस्त झाले. त्याचवेळी सेक्टर १७ येथील एसएस-३ पट्ट्यातील रात्री साधारण ९ वाजता गायब झालेली वीज पूर्ववत होण्यास रात्रीचे साडेबारा वाजले. त्याचप्रमाणे कोपरखैरणे गावातही सोमवार आणि मंगळवारी बराच वेळ वीजपुरवठा खंडित झाला होता. त्यातच बुधवारी सकाळी ११ वाजता मेंटेनन्सच्या कामासाठी कोपरखैरणे महावितरण कार्यालयातून दीड तासासाठी वीजपुरवठा खंडित करण्यात आला. याचा फटका कोपरखैरणे विभागातील बहुतांश व्‍यावसायिक भागाला बसला. ग्राहकांचे एका महिन्याचे वीजबिल थकले असेल तर त्यांची वीज खंडित करण्यासाठी तत्परता दाखवणारे महावितरण कार्यालय देखभाल-दुरुस्तीच्या कामासाठी उदासीन असल्याची भावना येथील नागरिक व्यक्त करीत आहेत. कोपरखैरणे विभागात वारंवार वीजपुरवठा खंडित होत आहे. महावितरणने याकडे गांभीर्याने पाहायला हवे. येथील लोकसंख्यावाढीनुसार महावितरणने केबल, डीपीच्या देखभाल-दुरुस्तीकडे अधिक लक्ष द्यावे, अशी मागणी भाजप शक्ती केंद्रप्रमुख वसंत जाधव यांनी केली आहे.